‏سربکف7 لیبل والی اشاعتیں دکھا رہا ہے۔ سبھی اشاعتیں دکھائیں
‏سربکف7 لیبل والی اشاعتیں دکھا رہا ہے۔ سبھی اشاعتیں دکھائیں

پیر، 11 مارچ، 2019

طلاقِ ثلاثہ مسلم خواتین کے لیے کوئی مسئلہ نہیں

آل انڈیا مسلم پرسنل لا بورڈ کی خاتون یونٹ نے کہا:”طلاق مرد کا حق ہے، خلع ہمارا حق ہے۔“

نئی دہلی (ایجنسیاں/ماہنامہ اللہ کی پکار)  مسلم خواتین کے کچھ گروہوں کی جانب سے طلاقِ ثلاثہ پر شدید تنقیدوں کا جواب دیتے ہوئے آل انڈیا مسلم پرسنل لا بورڈ کی خاتون یونٹ نے آج کہا کہ ”طلاقِ ثلاثہ کے حوالے سے نسوانی حقوق کے نام پر کچھ ہم دردیاں جتانے کی کوشش کی جارہی ہے۔ کچھ لوگ بلا وجہ طلاقِ ثلاثہ کے مسئلے کو طول دے رہے ہیں، جس کا کوئی جواز نہیں۔“

آل انڈیا مسلم پرسنل لا بورڈ مجلس عامہ کی رکن ڈاکٹر اسماء زہرا نے پریس کانفرنس سے خطاب کرتے ہوئے کہا کہ اس وقت میڈیا میں طلاق کا مسئلہ بڑے زور و شور سے اٹھایا جا رہا ہے اور یہ ظاہر کرنے کی کوشش کی جارہی ہے کہ طلاق ثلاثہ کی وجہ سے مسلم خواتین کی اکثریت پریشان ہے۔ ایک نشست میں تین طلاق، طلاقِ بدعت ہے اور اسے نا پسند کیا گیا ہے۔ اس کو بڑھا چڑھا کر میڈیا پیش کر رہا ہے۔ دوسرے مذاہب کے ماننے والوں کے مقابلے میں مسلمانوں میں طلاق کا فی صد بہت کم ہے۔اس قسم کی خواتین تنظیموں پر مسلم خواتین کا کوئی اعتماد نہیں ہے۔ یہ خواتین شریعت سے بیزار ہیں تو وہ ملک کے سول قوانین سے فیصلہ کرانے کے لیے آزاد ہیں۔ “

دار القضاء کی حیثیت ایک مشاورتی باڈی کی ہوتی ہے، دار القضاء ملک میں عدالتوں کے بوجھ کو ایک طرح کم کر رہے ہیں اور مسلم پرسنل لا میں کسی قسم کی مداخلت قطعاً برداشت نہیں کی جائے گی۔

     

بابائے خدمت عبد الستار ایدھی ہم میں نہیں رہے

محسن انسانیت عبد الستار ایدھی صاحب بتاریخ ۸ جولائی ۲۰۱۶ء کو اس دارِ فانی سے کوچ کر گئے۔ گردوں کے فیل ہونے کی وجہ سے   ۸۸ سال کی عمر میں انہوں نے دنیا کو خیر باد کہا۔  آپ ہمیشہ دوسروں کی فکر میں گھلتے رہے اور خود پر خرچ کرنا گویا حرام سمجھتے رہے۔ یہی وجہ کہ انہیں ”دی رچیسٹ پوور مینThe richest poor man“ یعنی امیر ترین غریب آدمی کہا جاتا ہے۔  ان کی سماجی خدمات کے اعتراف میں پاکستان حکومت کی جانب سے نشانِ امتیاز،  پاکستان سوک سوسائٹی کی جانب سے پاکستان سوک اعزاز، پاک فوج کی جانب سے اعزازی شیلڈ، پاکستان اکیڈمی آف میڈیکل سائنسز کی جانب سے اعزازِ خدمت، پاکستانی انسانی حقوق اعزاز، ۲۶ مارچ ۲۰۰۵ء عالمی میمن تنظیم کی جانب سے لائف ٹائم اچیومنٹ اعزاز(life time achievement award) سے نوازا گیا۔ اس کے علاوہ بین الاقوامی طور پر بھی کئی اعزازات بشمول ”دنیا کی سب سے بڑی رضاکارانہ ایمبولنس سروس- گنیز بک آف ورلڈ ریکارڈز۲۰۰۰ء“ ملے۔

ایدھی فاؤنڈیشن آج ترقی کی راہ پر گامزن ہے۔ ان کا کہنا ہے کہ وہ پاکستان میں ہر ۵۰۰ کلومیٹر پر ایک ہسپتال تعمیر کرنا چاہتے ہیں۔

     

نظر کی کمزوری اور داڑھی

ڈاکٹر شاہد محمود ﷾

مجھے کلین شیو زیادہ خوبصورت لگتے ہیں...
انگریزوں کے چہرے کتنے خوبصورت ہیں...
امریکی صدروں، وزیروں، مشیروں کے کلین شیو چہرے کتنے اچھے ہیں... 
یورپی،  امریکی اور ایشیائی اداکار اور گلوکار سب ہی کلین شیو ہیں اور کروڑوں لوگ ان کے شیدائی ہیں...
ہمارے اپنے ملک کے تمام وزیر اور وزیرِ اعظم اور تمام صدر کلین شیو ہیں...
ہماری تمام فوج کے سربراہ بھی کلین شیو ہیں اور...... 
ہمارے تمام اداکار بھی باقاعدگی سے شیو کرتے ہیں اور..... 
جدھر دیکھتا ہوں میں ...
 ادھر شیو ہی شیو ہے.. 
داڑھی رکھنے والے کو  دہشت گرد کہا جاتا ہے ...
بچے ڈرتے ہیں ...
شادی میں مسائل درپیش ...
نوکری خصوصاً فورسز میں انتہائی مشکلات کا سامنا کرنا پڑتا ہے ...
نوکری کی تلاش میں ناکامی ...
لوگوں کے طعنے نہیں جینے دیتے، ”داڑھی رکھ کر یہ کام کا نہ رہا...“
کسی لڑکی کا آئیڈیل داڑھی والا نہیں ہوتا...
چند داڑھی والے نوجوانوں کو چھوڑ کر ... کلین شیو نوجوانوں کی پکچر پر اتنے زیادہ لائک...
اس میں شک نہیں کہ ...
کائنات میں سب سے زیادہ خوبصورت چہرہ محبوبِ خُدا،  وجہِ کائنات آنحضرت ﷺ کا ہے اور اُن کو اللہ تعالیٰ نے داڑھی سے رونق بخشی...
آپ علیہ و سلم کو سب سے زیادہ نفرت داڑھی مُنڈوانے والوں سے تھی ...
تمام انبیاء علیہ اسلام کے داڑھی تھی. اور یوسف علیہ السلام تو اِس داڑھی میں بھی اتنے خوبصورت تھے کہ مصر کی حسیناؤں نے اُن کو دیکھا تو بےخودی میں اپنے ہاتھ کاٹ ڈالے...
تمام صحابہ،  تابعین، محدّثین،  مفسّرین، اولیاء اور بزرگانِ دین داڑھی والے تھے ...
اس دور کے تمام ائمہ کرام،  حفاظ،  علماء اور نیک اور بزرگ تمام ہی داڑھی والے ہیں ...
حرمین شریفین کے تمام اماموں کو اللہ تعالیٰ نے کتنی عزّت بخشی ہے ...
اور داڑھی والے بہت کم ہی کنوارے نظر آئیں گے... بلکہ اکثر تو زیادہ کی خواہش کا اظہار کرتے ہوئے ملیں گے.. کیونکہ داڑھی رکھنا قوتِ مردانہ کا مستقل ذریعہ ہے ...
تجارت کے اکثر شعبے دین داروں کے پاس ہیں خصوصاً سرحد اور بلوچستان... وہ سب داڑھی کے ساتھ اپنے کاروبار خوش اسلوبی سے چلا رہے ہیں...
کتنے شعبے ایسے ہیں جہاں داڑھی والے کو قابلِ اعتماد اور معزّز سمجھا جاتا ہے اور ذمہ داریاں سپرد کی جاتی ہیں...اور خوش اسلوبی سے اپنی ذمہ داریاں نبھا رہے ہیں...
یہ بھی سوچتا ہوں کہ...
داڑھی منڈوانے والا کافروں کی مشابہت اختیار کر رہا ہے اور اس کا حشر بھی اُن کے ساتھ ہو گا... یہ گناہ ہر وقت ساتھ ہوتا ہے ... اس کی نحوست بھی ہر وقت ساتھ ہوتی ہے... سنت کی مخالفت کی وجہ سے اللہ کی رحمت سے بھی محرومی مستقل ساتھ رہتی ہے...
کئی بار خیال بھی آتا ہے کہ داڑھی رکھ لوں.. .مگر ... سوچتا ہوں کہ بڑھاپے میں رکھوں گا... پھر خیال آتا ہے زندگی کا کیا بھروسہ، کہیں اسی نافرمانی ہی میں موت نہ آ جائے ...
میرے لیے دعا فرمائیں...
اللہ میری نظر کو درست فرما دے...
اللہم ارنا الحق حقاً وارزقنا اتّباعہُ...
 اے اللہ! حق کو حق کر کے دکھا دے اور اس کی اتّباع کی توفیق بھی دے دے 
وارناالباطلَ باطلاً وارزقنا اجتنابہُ...
 اور باطل کو باطل کر کے دکھا دے اور اس سے بچنے کی توفیق بھی نصیب فرما... 
داڑھی رکھنے کی ہے یہی ایک راہ 
 داڑھی رکھنے والوں سے راہ پیدا کر٭
اور
نقشِ قدم نبی کے ہیں جنت کے راستے 
اللہ سے ملاتے ہیں سنّت کے راستے
٭٭٭

٭ شعر خارج از بحر ہے۔ (مدیر)
     

ہمیں شیشہ نہ دکھاؤ

قاری معاذ شاہد ﷾ (پاک پتن، پنجاب، پاکستان)

یہاں پر جو بھی بات لکھو لوگوں کو اعتراض ضرور ہوتا ہے معاشرے کی برائیوں کا تذکرہ کریں تو لوگوں کو غصہ آتا ہے کہ ایسی باتیں کیوں کرتے ہیں،  آپ کو صرف برائیاں ہی نظر آتی ہیں۔  اگر کسی مثبت پہلو کو لے کر بات کریں تو کہتے ہیں کہ آپ کو برائیاں نظر نہیں آتیں۔
کئی تو ایسے تیر ہیں جو ہر جگہ ہر بندہ چلا لیتا ہے ہر بات پر کہہ دیا جاتا ہے کہ پانچ انگلیاں ایک برابر نہیں ہوتیں کون کہتا ہے کہ پانچ انگلیاں ایک برابر ہوتی ہیں مگر جب ایک لکھنے والا لکھتا ہے تو وہ ان پانچ انگلیوں میں سے دو کو ٹیڑھا سمجھتا ہے انہیں کو سامنے رکھ کر لکھتا ہے اور انہیں کی اصلاح مقصود ہوتی ہے اگر ہر کوئی یہی سوچے تو پھر تو کوئی بھی نہیں لکھ سکتا کیونکہ پانچ انگلیاں ایک برابر نہیں ہوتیں۔ 
اگر کبھی جنت کے شوق میں عمل کرنے کی ترغیب دی جائے تو کہا جاتا ہے کہ اللہ اور اسکی رضا کیلئے عمل کریں یہ نہ کہیں کہ جنت کیلئے کریں اور اگر کبھی اللہ کی محبت میں عمل کرنے کی ترغیب دیں تو جواب ملتا ہے انکو جنت کا بتا کر شوق دلوائیں تاکہ اس شوق سے عمل میں چستی پیدا ہو جس طرح صحابی نے حورِ عین کا سن کر کھجوریں پھینک دی تھیں کہ اب تو شہید ہونے میں جلدی کرنی چاہئے۔
کبھی اگر ملک کی عظمت اور اسکا شکر دل میں پیدا کرنے کیلئے کہا جائے کہ شکر کرو جیسا بھی ہے ہم آزاد ہیں یہ ہمارا ملک ہے اس پر فخر ہونا چاہئے،  لوگوں کو دیکھ کر رال نہ ٹپکائیے ، تو کہا جاتا ہے کہ آپ زمین کے ٹکڑے پر فخر کی بات کرتے ہیں جہاں یہ نہیں وہ نہیں اور اگر کرنا ہے تو مسلمان ہونے پر فخر کریں۔ 
جب نماز کی بات کریں تو کہا جاتا ہے کہ آپ نماز کے پیچھے پڑے ہیں جب حلال کمائی نہیں تو نماز کیا قبول ہوگی ہم نے نمازیوں کو دکانوں پر چھرے پھیرتے دیکھا۔ 
جب کبھی دین پر چلنے کی بات کریں تو کہتے ہیں کہ مولوی آپس میں لڑ رہے ہیں آپ بتائیں کس دین پر چلیں ۔ 
کبھی سیدھے الفاظ میں نوجوان نسل کو شیشہ دکھا دیں تو آواز آتی ہے کہ آپ کیسی بات کیسے الفاظ لے آئے آپ کو شرم آنی چاہئے۔ (بھلے ہی  ان کو کرتے ہوئے آئے یا نہیں۔) 
جب کبھی ذکر اذکار کی بات کریں تو کہتے ہیں کہ عزتیں لٹتی رہیں تسبیح چلتی رہی ۔ 
اگر کبھی مختصراً عرض کریں تو اور پہلوؤں کو لے کر اعتراضات کی بوچھاڑ کر دی جاتی ہے۔  اور اگر ہر پہلو کو سامنے لائیں تو کہتے ہیں پوسٹ لمبی نہ کیا کریں ویسے بھی عوام بہت سمجھدار ہے ایک لفظ سے پورا ورق سمجھ جاتی ہے۔ 
ہر واقعے کی تاریخ اور دلیل مانگتے ہیں ہر حدیث مبارک کا ہر شخص حوالہ مانگتا ہے وہ بھی جس نے کبھی صحاح ستہ کھول کر بھی نہیں دیکھیں ۔ ایک سے حوالہ مانگ کر دوسرے کو کہتے ہیں اسکی تحقیق کر کے جلدی بتائیں ۔ 
اگر بات مردوں کی بد نظری کی ہو تو ارشاد ہوتا ہے عورتوں کو پردہ بھی تو کروائیں ان کو کہیں اور اگر عورتوں کو حجاب کا کہا جائے تو حکم صادر ہوتا ہے کہ مردوں کی آنکھوں میں حیا پیدا کریں۔ 
گزارش ہے کہ ہر تحریر میں پوری کتاب نہیں سموئی جا سکتی کہ اس میں اس موضوع کے ہر پہلو کو ذکر کیا جائے ۔ اگر ایک تحریر ایک ٹاپک پر ہے تو غور کریں شاید اس سے قبل اس کے دوسرے پہلو پر قلم اٹھ چکا ہو۔  اگر نہیں تو جب اللہ تعالی نے توفیق عطا فرمائی دوسرے پہلو پر بھی کچھ الفاظ لکھ دیں گے۔  جب معاشرے کی برائیوں کی بات ہو تو اعتراض سے پہلے معاشرے پر ایک نظر ضرور ڈال لیا کریں اور اگر واقعتاً ویسا ہی ہو جیسا کہا گیا ہے تو اس برائی کو ختم کرنے کی کوشش میں لگنا اور اپنے آپ سے اس کی ابتداء کرنا اچھا ہے یا اس شخص کو چپ کروانا ضروری ہے جو ہمیں شیشہ دکھا رہا ہے ؟ 
کہیں یہ نہ ہو کہ نشان ہمارے چہرے پر ہو اور ہم غصے میں آ کر شیشہ ہی توڑ دیں اور تالیاں پیٹیں کہ ...
”داغ تھا ...مٹا دیا ۔ جان چھوٹ گئی۔ “
٭٭٭

     

طعامِ میت کے سلسلہ میں ہونے والی رسومات

صادق الامین ﷾ ( بجنور،یو پی، الہند)

اللہ تبارک و تعالیٰ نے ہمیں ایسا جامع ترین مذہب عطا فرمایا ہے جس کے اندر انسان کو پیش آنے والے ہر نشیب و فراز سے متعلق مکمل رہنمائی ملتی ہے۔ کسی بھی موقع پر انسان یہ نہیں کہہ سکتا کہ اس موقع پر اسے کیا کرنا چاہئے؟؟یا اس موقع پر کچھ کرنے کے لئے مذہب نے اسے کچھ نہیں بتایا۔
زندگی کا کوئی بھی مرحلہ ہو، مذہب انسان کی رہنمائی کے لئے موجود ہے۔ عبادات ہوں یا معاملات، خوشی ہو یا غم، دوستی ہو یا دشمنی، سفر یا حضر، ہر موقع کے احکام و آداب مذہب نے بتا دئے ہیں۔
جب تک خیر القرون اور اسکی برکتیں رہیں لوگ مضبوطی سے مذہب کا دامن تھامے رہے لیکن جیسے جیسے خیر القرون کو بُعد ہوتا گیا انسان نے مذہب کی آڑ میں بہت سی بدعات و رسومات کو وضع کر کے ان پر عمل شروع کر دیا۔
بدعات و رسومات میں پختہ ہو جانے کے بعد جب ان پر عمل کرنے میں دشواری محسوس ہوئی تو مذہب کی تنگ دامانی کا شکوہ کرنے لگا۔ حالانکہ یہ مصیبت خود اسکی اپنی لائی ہوئی ہے۔ مذہب نے تو کسی بھی موقع پر انسان کو اسکی طاقت سے زیادہ کا مکلف نہیں بنایا۔
منجملہ ان بدعات و رسومات کے جن میں لوگ گرفتار ہیں اور پریشان ہیں کہ انکا حل کیسے ہو؟؟ (جبکہ مذہب پہلے ہی انکا حل بتا چکا ہے) ایک رسم میت کے گھر کھانا پہنچانا اور وہاں کھانا ہے۔ جس میں  لوگوں نے اس حد تک رسومات کو بڑھاوا دیا کہ خود کو پریشانی لاحق ہونے لگی۔ لیکن پھر بھی ان رسومات کو ترک کرنے کے لئے تیار نہیں۔
مذہب اس سلسلہ میں جو رہنمائی کرتا ہے وہ حسبِ ذیل ہے۔
حدیث شریف:-
عن عبداللہ بن جعفر قال لما جاء نعی جعفر قال رسول اللہ (صلی اللہ علیہ وسلم) اصنعوا لاٰل جعفر طعامًا ،قد اتاھم امرًا یشغلھم
 (ابوداؤد 497/4،حدیث نمبر 3132) (ترمذی 323/3 حدیث نمبر 998) (ابن ماجہ 514/1 حدیث نمبر 1610) (مشکوٰۃ حدیث نمبر 1739) 
جب حضرت جعفر  کی شہادت کی خبر نبی ﷺ کو (بذریعہ وحی) ملی تو آپ نے (صحابہ سے) فرمایا کہ جعفر کے گھر والوں کے لئے کھانا تیار کرو(اور انکے گھر پہنچاؤ) اس لئے کہ انکو ایسی خبر پہنچی ہے جو انکو مشغول کر دے گی۔
(یعنی جعفر کی موت کے صدمہ کی وجہ سے وہ کھانے پینے کا انتظام نہ کر سکیں گے)
علماءِ کرام نے حدیث شریف کو سامنے رکھتے ہوئے فرمایا کہ جب کسی کے یہاں میت ہو جائے تو اسکے رشتہ داروں اور پڑوسیوں کو چاہئے کہ اسکے گھر اتنا کھانا بھیج دیں جو ایک دن رات کے لئے کافی ہو،(بھیجنے والا میت کا قریبی ہو یا دور کا رشتہ دار ہو، یا کوئی پڑوسی ہو)اور اصرار سے انکو کھلائیں۔
موجودہ دور میں لوگوں نے اس سلسلہ میں بہت سی بدعات و خرافات ایجاد کیں کہ بعض جگہ اتنا کھانا بھیج دیتے ہیں جو گھر والوں کی ضرورت سے زائد ہوتا ہے۔ اور وہ پریشان ہو جاتے ہیں کہ اتنا کھانا کیسے استعمال میں لایا جائے؟ کیونکہ دینے والے اسکو معیوب سمجھتے ہیں کہ انکا بھیجا ہوا کھانا میت کے گھر والوں کے علاوہ کوئی اور استعمال میں لائے۔ اور بعض تو کہہ بھی دیتے ہیں کہ ہم نے تو اس لئے دیا تھا کہ میت کے گھر والے کھائیں نا اس لئے کہ دوسروں کو بانٹ دیں۔ بعض جگہ ہفتہ عشرہ تک کھانا بھیجا جاتا ہے۔
(ان رسومات کی اصلاح کی ضرورت ہے)
بعض جگہ یہ دستور ہے کہ میت کے قریبی رشتہ دار کو کھانا بھیجنے کا حقدار سمجھا جاتا ہے۔ خواہ وہ حیثیت رکھتا ہو یا نہ رکھتا ہو۔ خواہ اس بےچارے کو قرض ہی کیوں نہ لینا پڑے۔
اگر کوئی دور کا رشتہ دار یا کوئی شریف پڑوسی بھیجے تو اسکو معیوب سمجھا جاتا ہے حالانکہ شریعت میں ایسی کوئی پابندی نہیں۔
بعض جگہ یہ دستور ہے کہ تدفین کے بعد میت کے گھر والے رشتہ داروں اور تعزیت کرنے والوں کے کھانے کا انتظام کرتے ہیں۔ اور اس سے فارغ ہو کر تیجہ دسواں چالیسواں کے انتظام میں لگ جاتے ہیں۔ شریعت کی رو سے یہ سب دعوتیں ممنوع ہیں۔ کیونکہ دعوت خوشی کے موقع پر ہوتی ہے نہ کہ غم لاحق ہونے پر۔ فقہاء نے ان دعوتوں کو مکروہ اور بدعتِ قبیحہ قرار دیا ہے۔ شامی زکریا (148/2) فتاوی بزازیہ (81/4) عالم گیری )مطبوعہ دارالکتاب، 167/1)
پس محلہ والوں اور آس پاس کے شریکِ جنازہ لوگوں کے لئے درست نہیں کہ وہ بعدِ تدفین یا تیجہ دسواں وغیرہ کے موقع پر وہاں کھانا کھائیں۔ اگر میت والے کھلانا چاہیں تو انکار کر دیں کیونکہ وہ سب رسم پڑ جانے کی وجہ سے مجبور ہیں کہ نہیں کھلائیں گے تو لوگ طعنہ دیں گے۔
البتہ دور دراز سے آئے ہوئے مہمان جن کو وہاں ایک دو روز ٹھہرنا ہے، یا جو زیادہ قریبی ہیں (کہ انکی وہاں موجودگی گھر والوں کے لئے باعثِ اطمینان ہوتی ہے) وہ وہاں کھانا کھا سکتے ہیں۔
ہمیں چاہئے کہ ان تمام بدعات و رسومات سے پرہیز کریں۔ اور اپنی زندگی کے ہر ہر لمحہ کو سنت کے موافق گزاریں۔
اللہ ہمیں قرآن و سنت پر عمل کرنے والا بنائے اور بدعات و رسومات سے ہماری حفاظت فرمائے۔
آمین ثم آمین۔
٭٭٭

     

بکھرے موتی

مزمل اختر ﷾ (کامٹی، الہند)

حضرت مولانا سعد صاحب دامت برکاتہم

1) مولانا یوسف صاحب فرمایا کرتے تھے، ” اسباب پر نگاہ کر کے، اللہ سے امید رکھنا، کفر کا راستہ ہے۔ “
2) بیٹھ کر بات کا سننا کسی تبدیلی کا ذریعہ بنے، ورنہ تقریریں اور بیان یہ دعوت کا مزاج ہی نہیں ہے ۔
3) دعوت کا تقاضا یہ ہے کہ اسلام کی نسبت پر جمع ہو نا اور اسلام کی نسبت پر بکھرنا۔
4) میرا دل چاہتا ہے اگر تین دن لگانے والا بھی اس کام کے ساتھ ہو تو اس کام کے ساتھ اس کا یقین یہ ہو کہ تربیت کا، توجہ کا، ہدایت کا، اور اللہ کی ذات کے ساتھ تعلق کے پیدا کرنے کا یہی راستہ ہے ۔
(یہ بات ملحوظ رہے اس سے مراد تبلیغی جماعت نہیں بلکہ دعوت و تبلیغ کے اعمال مراد ہیں جسے مولانا سعد صاحب دامت برکاتہم اعمالِ دعوت کہتے ہیں اور اسی کی طرف انھوں نے اشارہ کیا ہے ) 
5)  حضرت فرماتے تھے اس کام کے ساتھ مناسبت کی علامت یہ ہے کہ جس دن کوئی دعوت کا عمل چھوٹ جائے اس دن اس کو اپنی عبادت میں ایسا  ضعف اور ایسی کمزوری محسوس ہو جس طرح غذا نہ ملنے کی وجہ سے جسمانی کمزوری محسوس ہوتی ہے۔ 
6) حضرت فرماتے تھے *جب مومن کا ایمان کمزور ہو آتا ہے تو نفاق کی علامتیں اسکے لیے خوبیاں بن جاتی ہیں کہ جھوٹ بول کر خوش ہو، وعدہ خلافی کرنے والوں کو عقلمند کہا جاوے، اور خیانت کرنے والے کو چست و چالاک کہا جاوے حالانکہ یہ سب نفاق کی علامتیں ہیں ۔ 
7) علامہ اقبال نے کہا  ہے نا ، مومن کی پہچان یہ ہے کہ اسکے اندر آفاق گم ہے، اور کافر کی پہچان یہ ہے کہ وہ آفاق میں گم ہے ۔ ۱
8)  اپنے عمل کو غیر اللہ سے چھپانا اخلاص ہے ۔
9) یوں آتا ہے احادیث میں کہ  جو راستوں کو تنگ کرے گا اسکو اسکے دین کی محنت کا اجر نہیں ملے گا۔
10) ہماری بات کے پہنچنے کاتو سب سے آسان راستہ دوسروں کو راحت پہچانا ہے ۔
11) ہم امت کے ہر فرد کو دعوت پر اس لئے لانا چاہتے ہیں تاکہ یہ اپنی دین کی دعوت سے اپنے دین پر قائم رہے ، کیونکہ دین پر استقامت، دین کی دعوت سے باقی رہتی ہے۔
12) جب امت دعوت الی اللہ چھوڑ دے گی تو........ سب سے پہلی جو مسلمانوں میں کمزوری پیدا ہو گی وہ یہ کہ اپنے دین کو ہلکا سمجھے گی اور اپنے دین کو دنیا کے بدلے میں بیچ دے گی۔
13) دعوت الی اللہ امت کا اجتماعی فریضہ ہے۔
14) دوسروں کی اصلاح کے لیے دعوت دینا فرض کفایہ ہے۔
15) حضرت فرماتے تھے یقین کے بننے کا راستہ دعوت ہی ہے... اسکے علاوہ یقین کے بننے کا کوئی راستہ نہیں۔
16) ایمان اتنا سیکھنا فرض عین ہے، جو مومن کو حرام سے روک دے۔
 17) یوں فرماتے تھے مولانا یوسف صاحب کہ جس بات کرنے والے کے سامنے چھ نمبر کی حقیقت نہیں ہو گی صرف چھ نمبر کا علم ہوگا، تو اس علم کی وجہ سے دوسرے کے اصلاح کی نیت ہو جائے گی، اپنی اصلاح کی نیت نہ رہے گی، جس کی وجہ سے خود اس کی اپنی دعوت سے اس کا یقین نہ بنے گا اور دوسروں پر اس کی دعوت کا اثر بھی نہ ہو گا۔
18) دعوت اپنے یقین کی تبدیلی کے لیے ہیں ۔ 
1)ایک ایمان کا مفہوم ہے. . . . . . .  ایمان کا مفہوم :- اسکی پہنچ دماغ تک ہے ۔
2) ایک ایمان کے حروف ہیں. . . . . .  ایمان کے حروف :- اسکی پہنچ کتاب تک ہے ۔
3) ایک ایمان کا بول ہے. . . . . . . . . . ایمان کے بول :- اسکی پہنچ زبان تک ہے۔
4) ایک ایمان کی آواز ہے. . . . . . . . . ایمان کی آواز :- اسکی پہنچ کانوں تک ہے ۔
5) ایک ایمان کا اخلاص ہے. . . . . .  ایمان کا اخلاص :- اسکی پہنچ دل تک ہے۔
19) یہ ایمان کی حقیقت آئے گی...
ظاہر کے خلاف بولنے سے ...
ظاہر کے خلاف سوچنے سے ...
ظاہر کے خلاف سننے سے. .  اور ...
ظاہر کے خلاف چلنے سے ...
جب تک میرے دوستو! امت کے اندر یہ باتیں عام نہ ہوں گی اس وقت تک خدا کی قسم ایمان کی حقیقت کے ملنے کی ابتداء بھی نہ ہو گی۔
٭٭٭

۱بحوالہ کلیاتِ اقبال ص۵۵۷(مدیر)
کافر کی یہ پہچان کہ آفاق میں گم ہے
مومن کی یہ پہچان کہ گم اس میں ہیں آفاق!
     

فتاوی ٹی ویہ...

عمران اسلم ﷾ (سعودی عرب)

فتوی صرف مجھ سے پوچھ رے...
فتوی لے لو...
فتوی لے لو...
رنگ برنگے... نیلے پیلے...
اودے اودے سرخ سنہرے فتوے...
تازہ بہ تازہ ماڈرن دور سے مطابقت رکھتے فتوے...
آئی ایس او 2001 ”اپرؤوڈ“ فتوے...
میڈ ان کینڈا فتوے...
ملائشیا سنگار پور سے امپورٹڈ فتوے۔
ہمارے پاس مشہور و معروف حکومت پاکستان سے ”منظور شدہ“
لندن... واشنگٹن... پیرس... تہران سے ”کوالیفائیڈ “
عربی... خشک صحرائی فتووں کا توڑ
ہر برانڈکے فتاوی جات موجود ہیں۔
ہمارے پاس غامدی...حامدی... قادری... نقوی... سرمدی... جہانگیری اور ثمری ہر قسم کے مفتیان موجود ہیں۔
جن کی ”لیاقت“ منہ چڑھا کر بولتی ہے اور جن کا ”الطاف“ عام ہے۔
کلین شیوڈ... ”مٹھ“  داڑھی والے۔
گٹھ داڑھی والے... چنی داڑھی والے... مونچھ والے اور چکنے چتکبرے مفتی۔
فتوی آپ کی پسند اور سہولت کو مد نظر رکھ کر دیا جاتا ہے۔
گھر پر ڈلیوری کی سہولت موجود ہے۔
ہارڈ لائینر حکومت آنے تک وارنٹی...
فتوی کسی بھی وقت تبدیل کروایا جا سکتا ہے۔
ہمارے فتاوی کی اہم خصوصیت ...
کہ اسے آپ بقدر و بحساب ضرورت خود بھی موڑ سکتے ہیں...توڑ سکتے ہیں... جوڑ سکتے ہیں... اپنی مرضی سے۔
ہمارے فتوے ٹی وی پر بھی نشر ہوتے ہیں... پی ٹی وی اور لوکل چینلز کے ساتھ ساتھ بی بی سی... سی این این... فاکس نیوز پر
سائل کی تصویر کے ساتھ انٹرنیشنل لکھاری
وسعت قلبی کا مظاہرہ کرتے ہوئے آرٹیکلز بھی لکھتے ہیں۔
آئیے اٹھئے سوال پوچھئے... دماغ ”صاف“  کی جئے۔
سوچ کو ”جلا“  بخشئے۔
مولویوں سے جان چھڑائیے۔ ( اور ہمارے شکنجے میں آئیے)۔
اپنی مرضی چلائیے (ہماری مرضی کے مطابق)...
سائلہ ہونے کی صورت میں خصوصی توجہ اور بہترین خدمات۔
فتوی کے ساتھ ”خدا کے لئے“  اور ”بول“  کی ڈی وی ڈیز مفت میں حاصل کریں۔
ایک سے زیادہ فتوے پوچھنے والے کو ہالی وڈ کی کوئی سی ایک “ان سنسرڈ” مووی کی ڈی وی ڈی دی جائے گی۔
سب سے بہترین فتوی پوچھنے والے کا مختاراں مائی کے ساتھ ڈنر کا اہتمام کیا جائے گا۔.
احتیاط ” مدارس کے لڑکے بالوں اور “ملا” کی تقریر و تحریر پڑھنے والوں سے خاص دوری بنائے رکھیں۔
نوٹ :فاٹا میں ہماری کوئی برانچ نہیں ہے۔
کمپنی کی مشہوری کے لئے پہلا فتوی مفت۔ ۔ ۔
جو ہمارا فتوی نہ مانے وہ کمبخت... سڑا شدت پسند... بنیاد پرست... انتہاء پسند... جاہل... دہشت گردوں کا ساتھی... طالبانی ذہن... ملا ملانا... انھا کانا...
٭٭٭

     

تبلیغی جماعت کی مقبولیت کو سمجھیں

مولانا آفتاب اظہر صدیقی کشن گنجوی٭(بہار، الہند)

تبلیغی جماعت کوئی فرقہ یا مسلک نہیں؛ بلکہ فرقۂ مقبول اہل السنۃ والجماعۃ کی ایک تحریک ہے۔  ایک ایسی تحریک جس کا وجود قوم و ملت کی دین سے دوری کے درد کو دل میں جگہ دینے والے شخص کا اخلاص ہے... ایک ایسی تحریک جس کو صرف اس لئے عمل میں لایا گیا تاکہ مسلم عوام اپنے ایمان کی سلامتی کے ساتھ دنیا سے جائے... ایک ایسی تحریک جس نے پوری امت محمدیہ کی دینی بقاء کے لئے فکر لی... جس تحریک کے تحت مسلمانوں میں بے دینی کے ماحول کو ختم کرنے کا عزم لیا گیا... جس کے ذریعہ یہ فکر عام کی گئی کہ امت کس طرح جہنم کے سخت عذاب سے بچ کر جنت میں جانے والی بن جائے. لہذا تبلیغی جماعت کا عین مقصد اخروی کامیابی کا حصول ہے... کہ ہماری اصل زندگی یعنی آخرت سنور جائے... ہم اور ہمارے تمام مسلمان بھائی جنت میں جانے والے بن جائیں۔  یہ تحریک جہاں امر بالمعروف و نھی عن المنکر کے فریضے کو انجام دے رہی ہے وہیں دنیا کو امن و سلامتی کا پیغام بھی پہنچا رہی ہے۔ آج تبلیغی جماعت ساری دنیا میں مقبولیت پاچکی ہے اور یہ مقبولیت خدا کی طرف سے ہے... اللہ جل شانہ نے اس تحریک کی بے لوث محنت اور خلوصِ فکر کو قبولیت سے نواز کر ساری دنیا میں اس کی مقبولیت کو عام کر دیا ہے۔ گزشتہ ہزار صدیوں میں شاید ہی کسی تحریک کو اتنی جلد اتنی بڑی کامیابی مل گئی ہو جو تبلیغی جماعت کو نصف صدی میں ہی حاصل ہوئی۔ اس تحریک کی اس کامیابی کے پیچھے کئی وجوہات ہیں۔ مثلاً ً 
• اس تحریک کا تعلق مسلک اہل السنۃ والجماعۃ سے ہونا
• اپنی ذات کی اصلاح اور ایمان کی حفاظت کی مکمل فکر کرنا
• عالم اسلام کی دینی فکر کو لے کر چلنا
• اپنی جان، مال اور اپنے وقت کو بلا کسی دنیوی مفاد کے صرف اللہ کے لئے اس کام میں کھپانا
• فرائض و واجبات کے ساتھ ساتھ سنتِ نبوی و سنت صحابہ کی بے حد پابندی کرنا
• چھ نمبر ( ایمان، نماز، علم و ذکر، اکرام مسلم، اخلاص نیت اور تبلیغ) کی محنت کو ہر عام و خاص تک پہنچانا
• علماء کی رہنمائی میں رہ کر کام کرنا اور ان کا حد درجہ احترام کرنا
• تبلیغی سفر میں مساجد ( مکمل آداب کے ساتھ) اپنی قیام گاہ بنانا
 • ہر کام آپسی مشورہ سے طے کرنا
• اپنا ایک امیر بنا کر اس کی مان کر چلنا
یہ اہم امور ہیں جن کے سبب تبلیغی جماعت کو تقویت و قبولیت حاصل ہوئی۔
آج کل تبلیغی جماعت کی مخالفت بھی کی جانے لگی ہے؛ ٭بات صاف ہے کہ جب پیڑ پر پھل آنے لگتے ہیں تو پتھر بھی پھینکے جاتے ہیں؛ لیکن افسوس ہے ان علمائے قوم پر جو علی الاعلان اس کی مخالفت کرتے اور مخالفت میں تحریریں شائع کرتے ہیں؛ شاید وہ اس تحریک کے عالمی خوش کن نتائج سے ناواقف ہیں اور اس کی عالمی مقبولیت٭ سے ناآشنا ہیں، ان سے عرض ہے کہ آپ اپنے ہی مسلک کی اتنی بڑی اور مقبول ترین تحریک کی مخالفت میں کیوں لگے ہوئے ہیں؟ اگر اس تحریک سے منسلک کچھ لاعلم حضرات کم علمی کی وجہ سے غلو سے کام لے رہے ہیں یا تبلیغی جماعت کے بعض افراد بے اصولی کا مظاہرہ کرتے ہیں تو اس کا مطلب یہ تو نہیں کہ ہم سرے سے اس تحریک کو ہی بدنام کرنا شروع کر دیں اور اس کی کلی مخالفت میں قلم کو تلوار اور زبان کو قینچی بنا دیں۔ آہ ہمارے اس مخالفانہ اقدام سے جہاں دوسرے باطل فرقے ہمارے مسلک کا مذاق اڑاتے اور ہمیں آپسی انتشار کا شکار بتاتے ہیں وہیں وہ لوگ بھی بد ظن ہو رہتے ہیں جن کی دینی اصلاح تبلیغی جماعت کی وجہ سے ہی ہوئی ہے، جن کو مسجد کا پتہ ہی اس تحریک کی محنت سے ملا ہے، جن کی نماز وغیرہ اسی تبلیغی جماعت میں جا کر درست ہوئی ہے۔ غلطیاں سدھارنے کے لئے مخالفت کا طریقہ کہاں درست ہے؟ اور گھر کا معاملہ تو گھر کے افراد ہی آپس میں مل بیٹھ کر سلجھاتے ہیں نہ کہ دنیا کو سنا کر۔  خدا را اس بات کو سمجھئے کہ اللہ تعالی نے اس تبلیغی جماعت کی تحریک کے لئے ہمارے مسلک حق اہل السنۃ والجماعۃ کا انتخاب کیا اور بے انتہا قبولیت سے نوازا، یہ ہمارے لئے خوش قسمتی اور فخر کی بات ہے۔  آج ہندو پاک اور بیرونی ممالک میں باطل فرقوں کے نہ پنپنے اور دب کر رہ جانے کی ایک بڑی وجہ تبلیغی جماعت کا زور اور اس کا اثر و رسوخ ہے۔  باطل کے لئے ہماری یہ تحریک ایک آہنی دیوار بن چکی ہے، اس تحریک کی قدر کیجئے۔ 
٭٭٭

٭ مخالفت تو مولانا الیاسؒ کے عہد ہی سے شروع ہو چکی تھی۔ ہاں یہ ضرور ہے کہ اب ”اپنوں“ کے اعتراضات بہت سامنے آ رہے ہیں۔ غلو کی حمایت کا فقیر بھی قائل نہیں، لیکن اس قدر شدت کے ساتھ مخالفت کرنا کہ لوگ تحریک ہی سے بدظن ہوجائیں، سراسر نا درست ہے۔(مدیر)
٭ کسی بھی تحریک کی عالمی مقبولیت اس کے جواز پر دال نہیں ہوتی۔(مدیر)


     

علم و فضل کے ساتھ تواضع و للہیت(قسط۔ ۲)

مفتی محمد تقی عثمانی دامت برکاتہم

حضرت علی  کا واقعہ مشہور ہے کہ کسی یہودی نے ان کے سامنے آنحضرت ﷺ کی شان میں کوئی گستاخی کر دی تھی تو وہ اس پر چڑھ دوڑے اور اُسے زمین پر گرا کر اس کے سینے پر سوار ہو گئے۔ یہودی نے جو اپنے آپ کو بے بس پایا تو کھسیانا ہو کر اُس نے حضرت علی  کے روئے مبارک پر تھوک دیا۔ دیکھنے والوں نے دیکھا کہ حضرت علی   اُس کو چھوڑ کر فوراً الگ ہو گئے اور پوچھنے پر بتایا کہ میں پہلے آنحضرت ﷺ کی محبت کی بناء پر اس یہودی سے اُلجھا تھا۔ اگر تھوکنے کے بعد کوئی اور کارروائی کرتا تو یہ اپنے نفس کی مدافعت ہوتی۔
حضرت شیخ الہند ﷫نے اپنے اس عمل سے حضرت علی  کی یہ سنت تازہ فرما دی۔ مطلب یہی تھا کہ اب تک تو تقریر نیک نیتی سے خالص اللہ کے لیے ہو رہی تھی لیکن یہ خیال آنے کے بعد اپنا علم جتانے کے لیے ہوتی، اس لیے اسے روک دیا۔
*…*…*
٭۵- مدرسہ معینیہ اجمیر کے معروف عالم حضرت مولانا محمد معین الدین صاحب معقولات کے مسلّم عالم تھے۔ انھوں نے شیخ الہند حضرت مولانا محمود حسن صاحب قدس سرہ کی شہرت سن رکھی تھی، ملاقات کا اشتیاق پیدا ہوا تو ایک مرتبہ دیوبند تشریف لائے اور حضرت شیخ الہند ﷫کے مکان پر پہنچ گئے۔ گرمی کا موسم تھا۔ وہاں ایک صاحب سے ملاقات ہوئی جو صرف بنیان اور تہبند پہنے ہوئے تھے۔ مولانا معین الدین صاحب ﷫نے اُن سے اپنا تعارف کرایا اور کہا کہ ’’مجھے حضرت مولانا محمود حسن صاحب ﷫سے ملنا ہے‘‘ وہ صاحب بڑے تپاک سے مولانا اجمیری ﷫کو اندر لے گئے، آرام سے بٹھایا اور کہا کہ ’’ابھی ملاقات ہو جاتی ہے‘‘ مولانا اجمیری ﷫منتظر رہے، اتنے میں وہ شربت لے آئے اور مولانا کو پلایا۔ اس کے بعد مولانا اجمیری نے کہا کہ ’’حضرت مولانا محمود حسن صاحب کو اطلاع دیجیے‘‘ اُن صاحب نے فرمایا ’’آپ بے فکر رہیں اور آرام سے تشریف رکھیں ‘‘ تھوڑی دیر بعد وہ صاحب کھانا لے آئے اور کھانے پر اصرار کیا، مولانا اجمیری ﷫نے کہا کہ ’’میں مولانا محمود حسن صاحب سے ملنے آیا ہوں، آپ اُنھیں اطلاع کر دیجیے‘‘۔ ان صاحب نے فرمایا ’’اُنھیں اطلاع ہو گئی ہے آپ کھانا تناول فرمائیں ابھی ملاقات ہو جاتی ہے‘‘ مولانا اجمیری ﷫نے کھانا کھا لیا تو اُن صاحب نے اُنھیں پنکھا جھلنا شروع کر دیا۔ جب دیر گزر گئی تو مولانا اجمیری ﷫برہم ہو گئے اور فرمایا کہ آپ میرا وقت ضائع کر رہے ہیں، میں مولانا سے ملنے آیا تھا اور اتنی دیر ہو چکی ہے، ابھی تک آپ نے اُن سے ملاقات نہیں کرائی۔ اس پر وہ صاحب بولے کہ:
’’دراصل بات یہ ہے کہ یہاں مولانا تو کوئی نہیں ۔ البتہ محمود خاکسار ہی کا نام ہے۔‘‘
مولانا معین الدین صاحب یہ سن کر ہکا بکا رہ گئے اور پتہ چل گیا کہ حضرت شیخ الہند ﷫کیا چیز ہیں ؟
*…*…*
٭۶- امام العصر حضرت علامہ سید محمد انور شاہ صاحب کشمیری ﷫ علم و فضل میں یکتائے روزگار تھے۔ حکیم الامت حضرت مولانا اشرف علی صاحب تھانوی ﷫ نے اپنی ایک مجلس میں نقل کیا کہ ایک عیسائی فیلسوف نے لکھا ہے کہ ’’اسلام کی حقانیت کی ایک دلیل یہ ہے کہ غزالی ﷫ جیسا محقق اور مدقق اسلام کو حق سمجھتا ہے۔‘‘ یہ واقعہ بیان کر کے حکیم الامت ﷫ نے فرمایا: ’’میں کہتا ہوں کہ میرے زمانہ میں مولانا انور شاہ صاحب کا وجود اسلام کی حقانیت کی دلیل ہے کہ ایسا محقق اور مدقق عالم اسلام کو حق سمجھتا ہے اور اس پر ایمان رکھتا ہے۔‘‘
انہی حضرت شاہ صاحب ﷫ کا واقعہ حضرت مولانا محمد انوری صاحب ﷫ بیان فرماتے ہیں کہ مقدمہ بھاولپور کے موقع پر جب حضرت شاہ صاحب ﷫ نے قادیانیوں کے کفر پر بے نظیر تقریر فرمائی اور اس میں یہ بھی فرمایا کہ ’’جو چیز دین میں تواتر سے ثابت ہو اُس کا منکر کافر ہے‘‘ تو قادیانیوں کے گواہ نے اس پر اعتراض کیا:
’’آپ کو چاہیے کہ امام رازی ﷫ پر کفر کا فتویٰ دیں کیونکہ فواتح الرحموت شرح مسلم الثبوت میں علامہ بحرالعلوم ﷫ نے لکھا ہے کہ امام رازی ﷫ نے متواتر معنوی انکار کیا ہے۔‘‘
اس وقت بڑے بڑے علماء کا مجمع تھا، سب کو پریشانی ہوئی کہ فواتح الرحموت اس وقت پاس نہیں ہے، اس اعتراض کا جواب کس طرح دیا جائے؟ مولانا محمد انوری ﷫ جو اس واقعے کے وقت موجود تھے، فرماتے ہیں :
’’ہمارے پاس اتفاق سے وہ کتاب نہ تھی۔ مولانا عبد اللطیف صاحب ناظم مظاہر العلوم سہارنپور اور مولانا مرتضی حسن صاحب ﷫ حیران تھے کہ کیا جواب دیں گے؟‘‘
لیکن اسی حیرانی کے عالم میں حضرت شاہ صاحب ﷫ کی آواز گونجی:
 ’’جج صاحب! لکھیے، میں نے بتیس سال ہوئے، یہ کتاب دیکھی تھی، اب ہمارے پاس یہ کتاب نہیں ہے۔ امام رازی ﷫ دراصل یہ فرماتے ہیں کہ حدیث ”لا تجتمع امتی علی الضلالۃ “تواتر معنوی کے رُتبے کو نہیں پہنچی، لہٰذا انھوں نے اس حدیث کے متواتر معنوی ہونے کا انکار فرمایا ہے، نہ کہ تواتر معنوی کے حجت ہونے کا۔ ان صاحب نے حوالہ پیش کرنے میں دھوکے سے کام لیا ہے۔ ان کو کہو کہ عبارت پڑھیں ۔ ورنہ میں ان سے کتاب لے کر عبارت پڑھتا ہوں ۔‘‘
چنانچہ قادیانی شاہد نے عبارت پڑھی۔ واقعی اس کا مفہوم وہی تھا جو حضرت شاہ صاحب ﷫ نے بیان فرمایا۔ مجمع پر سکتہ طاری ہو گیا اور حضرت شاہ صاحب ﷫ نے فرمایا:
’’جج صاحب! یہ صاحب ہمیں مُفحم (لاجواب) کرنا چاہتے ہیں ۔ میں چونکہ طالب علم ہوں، میں نے دوچار کتابیں دیکھ رکھی ہیں، میں ان شاء اللہ مُفحم نہیں ہونے کا۔‘‘
ایک طرف علم و فضل اور قوت حافظہ کا یہ محیرالعقول کارنامہ دیکھیے کہ بتیس سال پہلے دیکھی ہوئی کتاب کا ایک جزوی حوالہ کتنی جز رسی کے ساتھ یاد رہا، دوسری طرف اس موقع پر کوئی اور ہوتا تو نہ جانے کتنے بلند بانگ دعوے کرتا، لیکن خط کشیدہ جملہ ملاحظہ فرمائیے کہ وہ تواضع کے کس مقام کی غمازی کر رہا ہے؟ اور یہ محض لفظ ہی نہیں ہیں، وہ واقعتاً اپنے تمام کمالات کے با وصف اپنے آپ کو ایک معمولی طالب علم سمجھتے تھے اور اس دعائے نبوی کے مظہر تھے کہ اللّٰہم اجعلنی فی عینی صغیرا وفی أعین النّاس کبیرا.
 حضرت مولانا محمد انوری ﷫ ہی راوی ہیں کہ ایک دفعہ حضرت شاہ صاحب ﷫ کشمیر تشریف لے جا رہے تھے، بس کے انتظار میں سیالکوٹ اڈّے پر تشریف فرما تھے، ایک پادری آیا اور کہنے لگا کہ آپ کے چہرے سے یہ معلوم ہوتا ہے کہ آپ مسلمانوں کے بڑے عالم دین ہیں ۔ فرمایا ’’نہیں ! میں طالب علم ہوں ‘‘ اس نے کہا ’’آ پ کو اسلام کے متعلق علم ہے؟‘‘ فرمایا ’’کچھ کچھ‘‘ پھر اُن کی صلیب کے متعلق فرمایا کہ ’’تم غلط سمجھے ہو۔ اس کی یہ شکل نہیں ہے۔‘‘ پھر نبی کریم ﷺ کی نبوت پر چالیس دلائل دیے۔ دس قرآن سے دس تورات سے، دس انجیل سے اور دس عقلی۔ وہ پادری آپ کی تقریر سن کر کہنے لگا کہ اگر مجھے اپنے مفادات کا خیال نہ ہوتا تو میں مسلمان ہو جاتا، نیز یہ کہ مجھے خود اپنے مذہب کی بہت سی باتیں آپ سے معلوم ہوئیں ۔
*…*…*
٭۷- احقر کے والد ماجد حضرت مولانا مفتی محمد شفیع صاحب مد ظلہم نے بار بار یہ واقعہ بیان فرمایا کہ جب میں دارالعلوم دیوبند میں ملاّ حسن پڑھاتا تھا تو ایک روز اس کی عبارت پر کچھ شبہ ہوا جو حل نہیں ہو رہا تھا۔ میں نے سوچا کہ حضرت شاہ صاحب ﷫ سے اس کے بارے میں استفسار کرنا چاہیے۔ چنانچہ میں کتاب لے کران کی تلاش میں نکلا، وہ اپنی جگہ پر نہیں تھے اور جب وہ اپنی جگہ پرنہ ہوں تو ان کا کتب خانہ میں ہونا متعین تھا۔ میں کتب خانہ میں پہنچا تو وہ کتب خانے کی بالائی گیلری میں بیٹھے مطالعہ میں مشغول تھے۔ میں ابھی نیچے ہی تھا کہ انھوں نے مجھے دیکھ لیا اور اوپر ہی سے میرے آنے کی وجہ پوچھی۔ میں نے عرض کیا کہ ’’ملا حسن کے ایک مقام پر کچھ اشکال ہے وہ سمجھنا تھا۔‘‘ وہیں بیٹھے بیٹھے فرمایا ’’عبارت پڑھیے‘‘ میں نے عبارت پڑھنی شروع کی تو بیچ ہی میں روک کر فرمایا: ’’اچھا ! یہاں آپ کو یہ شبہ ہوا ہو گا‘‘ اور پھر بعینہ وہی اشکال دُہرا دیا جو میرے دل میں تھا۔ میں نے تصدیق کی کہ واقعی یہی شبہ ہے، اس پر انھوں نے اس کے جواب میں وہیں سے ایسی تقریر فرمائی کہ تمام اشکال کافور ہو گئے۔
اب ظاہر ہے کہ حضرت شاہ صاحب ﷫ عرصہ دراز سے حدیث کی تدریس میں مصروف تھے اور منطق کی کتابوں سے واسطہ تقریباً ختم ہو گیا تھا لیکن اس کے باوجود یہ حافظہ اور یہ استحضار کرشمۂ قدرت نہیں تو اور کیا ہے؟
*…*…*
٭۸- احقر نے اپنے والد ماجد سے بھی سنا ہے اور شیخ الحدیث حضرت مولانا محمد یوسف صاحب بنوری مد ظلہم سے بھی کہ حضرت شاہ صاحب ﷫ نے ۱۳۲۱ھ میں علامہ ابن الہمام رحمہ اللہ کی مشہور شرح ہدایہ ’’فتح القدیر‘‘ اور اس کے تکملہ کا مطالعہ بیس سے کچھ زائد ایام میں کیا تھا اور کتاب الحج تک اس کی تلخیص لکھی تھی اور انھوں نے صاحب ہدایہ پر جو اعتراضات کیے ہیں اُن کا جواب بھی لکھا تھا۔ اس کے بعد مدت العمر ’’فتح القدیر‘‘ کی مراجعت کی ضرورت نہیں پڑی اور کسی تازہ مطالعہ کے بغیر اس کی نہ صرف باتوں بلکہ طویل عبارتوں تک کا حوالہ سبق میں دیا کرتے تھے۔ حضرت مولانا بنوری مد ظلہم فرماتے ہیں کہ انھوں نے ۱۳۴۷ھ میں ہم سے یہ واقعہ بیان کیا اور فرمایا:
’’چھبیس سال ہوئے پھر مراجعت کی ضرورت نہیں پڑی اور جو مضمون اس کا بیان کروں گا، اگر مراجعت کرو گے تفاوت کم پاؤ گے۔‘‘
*…*…*
٭۹- حضرت مولانا محمد منظور نعمانی صاحب مد ظلم حضرت شاہ صاحب ﷫ کے شاگرد ہیں ۔ وہ فرماتے ہیں کہ درس سے فراغت کے بعد میں جب بھی حضرت شاہ صاحب ﷫ کی خدمت میں حاضر ہوتا تو پہلے سے لکھے ہوئے متعدد سوالات کے جواب اُن سے معلوم کیا کرتا تھا۔ ایک دفعہ کی حاضری میں ترمذی شریف کی ایک عبارت کا حوالہ میں نے دیا اور عرض کیا کہ اس عبارت میں یہ اشکال ہے، بہت غور کیا لیکن حل نہیں ہو سکا۔ فرمایا ’’مولوی صاحب! آپ کو یاد نہیں رہا، مجھے خوب یاد ہے کہ جس سال آپ دورہ میں تھے اس موقع پر میں نے بتایا تھا کہ یہاں ترمذی کے اکثر نسخوں میں ایک غلطی واقع ہو گئی ہے لیکن لوگ سرسری طور پر گزر جاتے ہیں اور انھیں پتہ نہیں چلتا، ورنہ یہ اشکال سب کو پیش آنا چاہیے‘‘ پھر فرمایا کہ ’’صحیح عبارت اس طرح ہے‘‘ مولانا نعمانی مد ظلہم لکھتے ہیں :
’’اللہ اکبر! یہ بات بھی یاد رہتی تھی کہ فلاں سال اس موقع پر سبق میں یہ بات فرمائی تھی‘‘۔
(جاری ہے۔۔۔)
٭٭٭

     

بچوں کو قریب کیجیے!

محمد فیصل شہزاد ﷾ ( کراچی، پاکستان)

عربی کے چند کلمات ایک جگہ پڑھے تو ان کی جامعیت نے حیران کر دیا۔ چار کلمات پر مشتمل یہ نہایت قیمتی نصیحتیں گویا والدین کے بچوں کے ساتھ خوشگوار تعلقات کی کلید ہیں… ذرا ملاحظہ فرمائیں:
اقتربوا من ابناکم… وشاوروھم… وحاوروھم…واکسبوھم… قبل ان تخسروھم…!
ترجمہ: تم اپنے بچوں کے قریب رہا کرو …ان سے مشورے کیا کرو… تبادلۂ خیال کیا کرو… ان کے دل جیت لو… قبل اس کے کہ تم انہیں ہمیشہ کے لیے کھو دو…!
والدین کی سب سے اول اور بڑی ذمے داری، بچوں کی صحیح تعلیم و تربیت ہوتی ہے۔ بچپن اور لڑکپن کا زمانہ بے شعوری و بے خیالی کا دور ہوتا ہے۔ اس وقت بچے بڑوں کے رحم و کرم کے محتاج ہوتے ہیں۔ بچے انہی کو اپنا محسن سمجھتے ہیں جو انہیں اپنے قریب رکھتے ہیں، ان سے پیار کرتے ہیں۔ بہترین تربیت جو قربت و انسیت سے ممکن ہے، ڈانٹ ڈپٹ اور مار دھاڑ سے ہرگز ویسی ممکن ہی نہیں۔
سیرت النبی میں بچوں کے ساتھ آپ ﷺ کے حسنِ سلوک کا جائزہ لیں تو آپ بہترین مربی اور بچوں پر رحم کرنے والے نظر آئیں گے۔ آپ ﷺ نے بچوں کے ساتھ نرمی، محبت، عاطفت، ملاطفت کا درس نہ صرف اپنی تعلیمات ہی کے ذریعہ دیا، بلکہ اپنے عمل سے بھی اس کا ثبوت پیش فرمایا۔
آپﷺ نے بچوں کے بچپنے کا ہر لحاظ سے خیال رکھا۔ اپنی تمام تر رفعت شان کے باوجود ان کے ساتھ کھیلے بھی اور کبھی ان پر سختی نہیں فرمائی۔ اپنے پیارے نواسوں سے آپﷺ کی محبت و شفقت کے کئی واقعات ہم سنتے پڑھتے رہتے ہیں کہ کیسے وہ عین نماز کی حالت میں بھی لاڈ سے آپ ﷺ پر سوار ہو جاتے تھے اور آپﷺ ناراض تو کیا ہوتے، ان کے لیے سجدے کو طویل فرما لیتے۔
ایک بار آپ حضرت حسن کو چوم رہے تھے۔ ایک دیہاتی نے اعتراض کرتے ہوئے گویا حیرت کا اظہار کیا تو آپ ﷺ نے فرمایا:
”اگر اللہ نے تیرے دل سے رحمت کو نکال دیا تو میں کیا کر سکتا ہوں!“
ایک بار ایک اور ایسے ہی موقعے پر جب ایک صحابی نے حیرت کا اظہار کیا تو فرمایا کہ جو شخص رحم نہیں کرتا، اس پر رحم نہیں کیا جاتا۔
مسلمان تو مسلمان ،حضور نے تو کفار کے بچوں کے ساتھ بھی نرمی کی تلقین فرمائی۔ ایک یہودی کا لڑکا آپ علیہ السلام کی خدمت میں آیا کرتا تھا۔ وہ ایک دفعہ بیمار ہو گیا۔ آپﷺ نے از خود تشریف لا کر اس کی عیادت فرمائی۔ اس بچے کے سرہانے بیٹھے، پھر اس بچے سے فرمایا: ”اسلام قبول کرو۔ “
اس بچے نے اپنے والد پر نظر ڈالی۔ والد نے بھی کہا: ”ابوالقاسم (ﷺ)کی اطاعت کرو۔“
 لہٰذا وہ بچہ مسلمان ہو گیا۔ آپﷺ یہ کہتے ہوئے نکلے:
"تمام تعریفیں اسی اللہ کے لیے ہیں جس نے اس کو آگ سے بچا لیا۔"
آج اس اسوۂ حسنہ کی روشنی میں ہم اپنے سلوک کا جائزہ لیں تو معلوم ہو گا کہ کفار اور غیر کے بچے تو الگ، ہم اپنے بچوں، اپنے خون کے ساتھ کیسا بیگانے کا سا سلوک کرتے ہیں؟
باپ کی درشت مزاجی کی وجہ سے بچہ پڑوسی انکل کے زیادہ قریب، باپ سے دور ہوتا ہے…بات بات پہ مارنا، چلانا، برا بھلا کہنا بچوں کو نہ صرف ڈھیٹ بنا دیتا ہے بلکہ ان کو ماں باپ سے دور بھی کر دیتا ہے… پھر ہوتا یہ ہے کہ بچے اس جذباتی خلا کو باہر والوں سے پر کرنے کی کوشش کرتے ہیں… باہر پھرتے سفاک درندے ایسے ہی معصوموں کا شکار کرنے گھات لگائے بیٹھے ہوتے ہیں… سو وہ انہیں جھوٹی محبت کے جال میں پھانس کر ان کا جذباتی و جنسی استحصال تک کر بیٹھتے ہیں۔
گھر میں خود بچے سے متعلق امور میں بھی اس سے کوئی مشورہ نہیں ہوتا، نہ اس سے رائے لی جاتی ہے اور نہ اس کی پسند ناپسند کا خیال رکھا جاتا ہے… ہر وقت، ہر بات میں بس اپنی مرضی چلائی بلکہ باقاعدہ ٹھونسی جاتی ہے… آہستہ آہستہ والدین اور بچوں کے درمیان ایک ایسی اجنبیت کی دیوار کھڑی ہونے لگتی ہے کہ پھر بچہ کسی جذباتی کشمکش کا شکار ہو جائے، اس کے ساتھ کچھ غلط ہونے لگے تو وہ چاہتے ہوئے بھی اپنی بات والدین سے شیئر نہیں کر پاتا… اور یوں یہ صورت حال کبھی خدانخواستہ ناقابل تلافی نقصان کا باعث بن جاتی ہے۔
یاد رکھیے …انگلی پکڑ کر چلانے والے ہاتھ جب ہاتھ چھوڑ دیں تو پھر جانے کون کون انگلیاں پکڑتا ہے اور کس کس سمت لے جاتا ہے۔ اپنے احساسات کو جھنجھوڑیے، اپنی غفلت کو دور کیجیے۔ مستقبل کے ان ہونہار نونہالوں کو اپنے سے قریب کیجیے، ان سے مشورے کیجیے، انہیں اہمیت کا احساس دلائیے، گاہے ان کے ساتھ تبادلۂ خیال کیا کیجیے اور ان کے دل جیت لیجیے… قبل اس کے کہ انہیں ہمیشہ کے لیے کھو دیا جائے…!
اللہ ہم سب کو عقل سلیم عطا فرمائے اور اچھے والدین بننے کی توفیق عطا فرمائے آمین۔
٭٭٭

     

اماں جی

ملک خداداد خان
انتخاب: جاوید خان صافی﷾(پشاور، پاکستان)

ریٹائرڈ  ایئر وائس مارشل ملک خداداد خان صاحب کی ایک نہایت ہی عمدہ اور دل کو چھُو لینے والی تحریر ۔
ہمیں اماں جی اس وقت زہر لگتیں  جب وہ سردیوں میں زبردستی ہمارا سر دھوتیں۔
لکس ، کیپری ، ریکسونا کس نے دیکھے تھے ..... کھجور مارکہ صابن سے کپڑے بھی دھلتے تھے اور سر بھی۔آنکھوں میں صابن کانٹے کی طرح چبھتا ... اور کان اماں کی ڈانٹ سے لال ہو جاتے !!!
ہماری ذرا سی شرارت  پر اماں آگ بگولہ ہو جاتیں... اور کپڑے دھونے والا ڈنڈا اٹھا لیتیں جسے ہم "ڈمنی" کہتے تھے ... لیکن مارا کبھی نہیں- کبھی عین وقت پر دادی جان نے بچا لیا ... کبھی بابا نے اور کبھی ہم ہی بھاگ لئے  ...
گاؤں کی رونقوں سے دور عین فصلوں کے بیچ ہمارا ڈیرہ تھا - ڈیرے سے پگڈنڈی پکڑ کر گاؤں جانا اماں کا سب سے بڑا شاپنگ ٹور ہوا کرتا تھا ... اور اس ٹور سے محروم رہ جانا ہماری سب سے بڑی بدنصیبی !!
اگر کبھی اماں اکیلے گاؤں چلی جاتیں تو واپسی پر ہمیں مرنڈے سے بہلانے کی کوشش کرتیں .... ہم پہلے تو ننھے ہاتھوں سے اماں جی کو مارتے .... ان کا دوپٹا کھینچتے ... پھر ان کی گود میں سر رکھ کر منہ پھاڑ پھاڑ کر روتے۔
کبھی اماں گاؤں ساتھ لے جاتیں تو ہم اچھلتے کودتے خوشی خوشی ان کے پیچھے پیچھے بھاگتے ..... شام گئے جب گاؤں سے واپسی ہوتی تو ہم بہت روتے.....ہمیں گاؤں اچھا لگتا تھا " ماں ہم گاؤں میں کب رہیں گے " میرے سوال پر اماں وہی گھسا پٹا جواب دیتیں ...." جب تو بڑا ہوگا ... نوکری کرے گا ... بہت سے پیسے آئیں گے ... تیری شادی ہوگی ..." وغیرہ وغیرہ ... یوں ہم ماں بیٹا باتیں کرتے کرتے تاریک ڈیرے پر آن پہنچتے ...
 مجھے یاد ہے گاؤں میں بابا مظفر کے ہاں شادی کا جشن تھا۔ وہاں جلنے بجھنے والی بتیاں بھی لگی تھیں اور پٹاخے بھی پھوٹ رہے تھے۔ میں نے ماں کی بہت منّت کی کہ رات ادھر ہی ٹھہر جائیں لیکن وہ نہیں مانی۔ جب میں ماں جی کے پیچھے روتا روتا گاؤں سے واپس آرہا تھا تو نیت میں فتور آگیا اور چپکے سے واپس گاؤں لوٹ گیا.....
شام کا وقت تھا .... 
ماں کو بہت دیر بعد میری گمشدگی کا اندازہ ہوا۔ وہ پاگلوں کی طرح رات کے اندھیرے میں کھیتوں کھلیانوں میں آوازیں لگاتی پھری ۔ اور ڈیرے سے لیکر گاؤں تک ہر کنویں میں لالٹین لٹکا کر جھانکتی رہی ۔ 
رات گئے جب میں  شادی والے گھر سے بازیاب ہوا تو وہ شیرنی کی طرح مجھ  پر حملہ آور ہوئیں۔ اس رات اگر گاؤں کی عورتیں مجھے نہ بچاتیں تو اماں مجھے مار ہی ڈالتی۔
ایک بار ابو جی اپنے پیر صاحب کو ملنے سرگودھا گئے ہوئے تھے۔ میں اس وقت چھ سات سال کا تھا۔ مجھے شدید بخار ہو گیا۔ اماں جی نے مجھے لوئی میں لپیٹ کر کندھے پر اٹھایا اور کھیتوں کھلیانوں سے گزرتی تین کلو میٹر دور گاؤں کے اڈے پر ڈاکٹر کو دکھانے لے گئیں۔ واپسی پر ایک کھالے کو پھلانگتے ہوئے وہ کھلیان میں گر گئیں ... لیکن مجھے بچا لیا ... انہیں شاید گھٹنے پر چوٹ آئ ی... ان کے مونہہ سے میرے لئے ”حسبی اللہ“ نکلا ... اور اپنے سسرال کے لئے کچھ ناروا الفاظ ... یہ واقعہ میری زندگی کی سب سے پرانی یادداشتوں میں سے ایک ہے .... 
یقیناً وہ بڑی ہمت والی خاتون تھیں۔ اور آخری سانس تک محنت مشقت کی چکی پیستی رہیں ...
پھر جانے کب میں بڑا ہو گیا اور اماں سے بہت دور چلا گیا...
سال بھر بعد جب گھر آتا.....تو ماں گلے لگا کر خوب روتی لیکن میں سب کے سامنے ہنستا رہتا۔ پھر رات کو جب سب سو جاتے تو چپکے سے ماں کے ساتھ جا کر لیٹ جاتا اور اس کی چادر میں منہ چھپا کر خوب روتا۔ 
ماں کھیت میں چارہ کاٹتی اور بہت بھاری پنڈ سر پر اٹھا کر ٹوکے کے سامنے آن پھینکتی۔ کبھی کبھی خود ہی ٹوکے میں چارہ ڈالتی اور خود ہی ٹوکہ چلاتی ۔ جب میں گھر ہوتا تو مقدور بھر ان کا ہاتھ بٹاتا۔ جب میں ٹوکہ چلاتے چلاتے تھک جاتا تو وہ سرگوشی میں پوچھتیں ... " بات کروں تمہاری فلاں گھر میں ....؟؟ " 
وہ جانتی تھی کہ میں پیدائشی عاشق ہوں اور ایسی باتوں سے میری بیٹری فل چارج ہو جاتی ہے۔
پھر ہم نے گاؤں میں گھر بنا لیا ... اور ماں نے اپنی پسند سے میری شادی کر دی۔ 
میں فیملی لے کر شہر چلا آیا اور ماں نے گاؤں میں اپنی الگ دنیا بسا لی۔
وہ میرے پہلے بیٹے کی پیدائش پر شہر بھی آئیں .... میں نے انہیں سمندر کی سیر بھی کرائی...کلفٹن کے ساحل پر چائے پیتے ہوئے انہوں نے کہا " اس سمندر سے تو ہمارے ڈیرے کا چھپڑ  زیادہ خوبصورت لگتا ہے...."
ماں بیمار ہوئی تو میں چھٹی پر ہی تھا... انہیں کئی دن تک باسکو پان  کھلا کر سمجھتا رہا کہ معمولی پیٹ کا  درد ہے ... جلد افاقہ ہو جائے گا ... پھر درد بڑھا تو شہر کے بڑے ہسپتال لے گیا جہاں ڈاکٹر نے بتایا کہ جگر کا کینسر آخری اسٹیج پر ہے ......
خون کی فوری ضرورت محسوس ہوئی تو میں خود بلڈ بینک بیڈ پر جا لیٹا .... ماں کو پتا چلا تو اس نے دکھ سے دیکھ کر اتنا کہا..." کیوں دیا خون...خرید لاتا کہیں سے...پاگل کہیں کا "
میں بمشکل اتنا کہ سکا .... " اماں خون کی چند بوندوں سے تو وہ قرض بھی ادا نہیں ہو سکتا ...  جو آپ مجھے اٹھا کر گاؤں ڈاکٹر کے پاس لیکر گئیں تھیں ... اور واپسی پر کھالا پھلانگتے ہوئے گر گئی تھیں .... "
وہ کھلکھلا کر ہنسیں تو میں نے کہا "اماں مجھے معاف کر دینا ... میں تیری خدمت نہ کر سکا "
میرا خیال ہے کہ میں نے شاید ہی اپنی ماں کی خدمت کی ہو گی ... وقت ہی نہیں ملا ... لیکن وہ بہت فراخ دل تھیں .... بستر مرگ پر جب بار بار میں اپنی کوتاہیوں کی ان سے معافی طلب کر رہا تھا تو کہنے لگیں " میں راضی ہوں بیٹا ... کاہے کو بار بار معافی مانگتا ہے ! "
ماں نے میرے سامنے دم توڑا .... لیکن میں رویا نہیں ... دوسرے دن سر بھاری ہونے لگا تو قبرستان چلا گیا اور قبر پر بیٹھ کر منہ پھاڑ کر رویا۔
مائے نی میں کنوں آکھاں 
درد وچھوڑے دا حال نی 
ماں سے بچھڑے مدت ہوگئی...اب تو یقین بھی نہیں آتا کہ ماں کبھی اس دنیا میں تھی بھی کہ نہیں....!
آج بیت اللہ کا طواف کرتے ہوئے پٹھانوں اور سوڈانیوں کے ہاتھوں فٹ بال بنتا بنتا  جانے کیسے دیوار کعبہ سے جا ٹکرایا...
یوں لگا جیسے مدتوں بعد پھر ایک بار ماں کی گود میں پہنچ گیا ہوں .... وہی سکون جو ماں کی گود میں آتا تھا ... وہی اپنائیت ... وہی محبت ... جس میں خوف کا عنصر بھی شامل تھا ....  اس بار منہ پھاڑ کر نہیں .... دھاڑیں مار مار کر رویا !!
ستر ماؤں سے زیادہ پیار کرنے والا ربِ کعبہ ..... اور ہم سدا کے شرارتی بچے !!!
رَّبِّ ارْحَمْهُمَا كَمَا رَبَّيَانِي صَغِيرًا…٭
٭٭٭

     

سب سے عظیم نیکی .... تقویٰ اور اسکے10 انعامات

عبد الرحمٰن صدیقی ﷾ (فیض آباد، یو پی، الہند)

اللہ پاک نے قرآن مجید میں بار بار تقویٰ اختیار کرنے کا حکم فرمایا ہے کہ تقویٰ اختیار کرو اور گناہ کو چھوڑ دو اور آجکل 
کی حکومتیں بھی کہتی ہیں کہ” کچھ دو اور کچھ لو “کی بنیاد پر کام چلاؤ.... اللہ پاک نے ہم سے گناہ چھڑوا کر کیا دیا.... لہٰذا تقویٰ پر اللہ کے دینی و اخروی انعامات دیکھئے....

پہلا انعام : ہر کام میں آسانی

اللہ تعالٰی فرماتے ہیں کہ اگر تم تقویٰ سے رہو گے تو ہم تمہارے سب کام آسان کر دیں گے...
وَمَنْ يَتَّقِ اللَّهَ يَجْعَلْ لَهُ مِنْ أَمْرِهِ يُسْرًا (سورہ ۶۵، الطلاق:۴)
ہم اپنے حکم سے اس کے سب کام آسان کر دیں گے... کیوں صاحب! یہ نعمت نہیں ہے کہ انسان کے سب کام آسان ہو جائیں؟

دوسرا انعام : مصائب سے چھٹکارا

وَمَنْ يَتَّقِ اللَّهَ يَجْعَلْ لَهُ مَخْرَجًا(سورہ ۶۵، الطلاق:۲)
اس کو اللہ تعالیٰ مصیبت سے جلد نکال دیں گے ۔ اس کو مصائب سے خروج اور ایگزٹ (Exit) جلد ملے گا۔

تیسرا انعام : بے حساب رزق

وَيَرْزُقْهُ مِنْ حَيْثُ لاَ يَحْتَسِبُ(سورہ ۶۵، الطلاق:۳)
اللہ ایسے راستے سے اسکو روزی دے گا جہاں سے اس کو گمان بھی نہیں ہوگا۔ تقویٰ بے خسارہ کی تجارت ہے، یہ اللہ پاک سے تجارت ہے، بے خسارہ کی ہے اور سود بھی نہیں۔ تقویٰ میں نفع ہی نفع ہے اس میں کبھی خسارہ نہیں ہے، تمہارے رب کی طرف سے کبھی وعدہ خلافی نہیں ہوتی۔ اگر وعدہ پورا ہونے میں کبھی تاخیر نظر آئے تو سمجھ لو کہ تم نے کہیں نالائقی کی ہے، تمہارے تقویٰ میں کمی آ گئی ہے۔ نگاہ چشمی کی حفاظت بھی فرض ہے اور نگاہ قلبی کی حفاظت بھی فرض ہے یعنی دل کی نگاہ کو بھی بچاؤ، گندے اور شہوانی خیالات بھی دل میں مت لاؤ۔

چوتھا انعام : نورِ فارق

اللہ تعالیٰ ایک نورِ فارق بھی عطا کرتے ہیں، جس میں بُرائی بھلائی کی تمیز رہتی ہے۔
يَا أَيُّهَا الَّذِينَ آمَنُوا إِنْ تَتَّقُوا اللَّهَ يَجْعَلْ لَكُمْ فُرْقَانًا(پ ۹، سورہ ۸، الانفال:۲۹)

پانچواں انعام : نورِ سکینہ

جو شخص تقویٰ میں رہتا ہے اللہ تعالیٰ اسکو نورِ سکینہ عطا کرتے ہیں۔ ملا علی قاری رحمۃ اللہ علیہ شرح مشکوٰۃ میں لکھتے ہیں کہ اگر وہ اللہ کا ولی ہے تو اللہ تعالیٰ  اسکی حفاظت فرمائیں گے اور گناہ سے بچا لیں گے۔  اس کے دل میں ایسی بےچینی آئے گی اور گناہ میں اس کو ایسی موت نظر آئے گی کہ وہ گناہ اور تقویٰ دونوں کا توازن بنا لے گا اور کہے گا کہ نہیں بھائی تقویٰ ہی میں فائدہ ہے اور گناہ میں تو بہت مصیبت نظر آ رہی ہے۔

چھٹا انعام : پُر لطف زندگی

فَلَنُحْيِيَنَّهُ حَيَاةً طَيِّبَةً(سورہ ۱۶، النحل:۹۷)
 اگر تم اعمال صالحہ کرو گے تو ہم تم کو ضرور با لطف زندگی عطا کریں گے۔ اللہ کی فرمانبرداری پر اللہ کا وعدہ ہے کہ ہم تم کو با لطف زندگی دیں گے۔ ہماری نالائقی کی وجہ سے اللہ نے یہ اہتمام فرمایا کہ ظالمو تم نفس کی بد معاشیوں کے چکر میں ہو لہٰذا ہم یہ آیت لام تاکید بانون ثقیلہ نازل کر رہے ہیں تاکہ تمہیں اطمینان ہو جاوے کہ واقعی اللہ پُر لطف اور مزےدار زندگی دے گا ورنہ بغیر کسی اضافی تاکید کے بھی اللہ تعالیٰ کا کلام انتہائی موکد ہے۔ آہ یہ ہماری نالائقی، کہ جس  کی وجہ سے اللہ تعالیٰ نے اتنا اہتمام فرمایا۔٭

ساتواں انعام : عزت و اکرام

إِنَّ أَكْرَمَكُمْ عِنْدَ اللَّهِ أَتْقَاكُمْ(سورہ ۴۹، الحجرات:۱۳)
معزز وہی لوگ ہیں جو تقویٰ سے رہتے ہیں۔  ایک اعلیٰ خاندان والا اگر خدانخواستہ بدمعاش ہے،  شرابی ہے، زنا کرتا ہے اور ایک جولاہا تقویٰ سے رہتا ہے بتاؤ کون افضل ہے؟ ایک کالے رنگ والا ہے لیکن اللہ کا ولی ہے اور ایک سفید گوری چمڑی والا انگریز ہے،  چاہے مسلمان بھی ہو لیکن شراب اور زنا نہیں چھوڑتا تو وہ کالا حبشی اللہ کا ولی ہے... اس کے پیر دھو کر پی لے.. چمڑی سے کچھ نہیں ہوتا...

آٹھواں انعام : اللہ کی ولایت کا تاج

یہ سب سے بڑا انعام ہے.. اللہ تعالیٰ فرماتے ہیں اگر تم تقویٰ اختیار کرو گے تو ہم تمہاری غلامی کے سر پر اپنی دوستی کا تاج رکھ دیں گے یعنی تم کو ولی بنا لیں گے.. .
إِنْ أَوْلِيَاؤُهُ إِلاَّ الْمُتَّقُونَ(سورہ ۸، الانفال:۳۴)
 اللہ کا ولی بن کر مرنا فائدہ مند ہے یا گنہگار اور فاسق ہو کر مرنا؟  اور متقی ہو کر پھر کچھ دن جیو بھی تاکہ اللہ کی ولایت اور دوستی کا صحیح مزہ دنیا سے لے کر جاؤ...

نواں انعام : گناہوں کا کفّارہ

تقویٰ کا ایک انعام سیئات اور بُرے اعمال کا کفارہ ہے...
يَا أَيُّهَا الَّذِينَ آمَنُوا إِنْ تَتَّقُوا اللَّهَ يَجْعَلْ لَكُمْ فُرْقَانًا وَيُكَفِّرْ عَنكُمْ سَيِّئَاتِكُمْ(سورہ ۸، الانفال:۲۹)
یعنی جو خطائیں اور لغزشیں اس سے سرزد ہوتی ہیں دنیا میں اُنکا کفارہ اور بدل کر دیا جاتا ہے یعنی اس کو ایسے اعمال صالحہ کی توفیق ہو جاتی ہے جو اُس کی سب لغزشوں پر غالب آ جاتے ہیں...

دسواں انعام : آخرت میں مغفرت

وَيَغْفِرْ لَكُمْ(حوالۂ سابق)
تقویٰ کے انعامات میں سے ایک انعام آخرت میں مغفرت اور سب گناہوں، خطاؤں کی معافی ہے...

     

ہم سر بکف اٹھے ہیں کہ حق فتح یاب ہو

ساحر لدھیانوی

ہم امن چاہتے ہیں مگر ظلم کے خلاف
گ جنگ لازمی ہے تو پھر جنگ ہی سہی

ظالم کو جو نہ روکے وہ شامل ہے ظلم میں
قاتل کو جو نہ ٹوکے، وہ قاتل کے ساتھ ہے
ہم سر بکف اٹھے ہیں کہ حق فتح یاب ہو
کہہ دو اسے جو لشکرِ باطل کے ساتھ ہے

اس ڈھنگ پر ہے زور تو یہ ڈھنگ ہی سہی

ظالم کی کوئی ذات، نہ مذہب نہ کوئی قوم
ظالم کے لب پہ ذکر بھی ان کا گناہ ہے
پھیلتی نہیں ہے شاخِ تبسم اس زمیں پر
تاریخ جانتی ہے زمانہ گواہ ہے

کچھ کور باطنوں کی نظر تنگ ہی سہی

یہ زر کی جنگ ہے نہ زمینوں کی جنگ ہے
یہ جنگ ہے بقا کے اصولوں کے واسطے
جو خون ہم نے نذر دیا ہے زمین کو
وہ خون ہے گلاب کے پھولوں کے واسطے

پُھوٹے گی صبحِ امن، لہو رنگ ہی سہی

(انشا اللہ )

     

غزل - دیکھ کر رہ گیا کنارا بھی (ریحان کوثر، کامٹی)

ریحان کوثر ﷾ ( کامٹی، الہند)

دیکھ کر رہ گیا کنارا بھی
میں نے ہر چند اسے پکارا بھی

ایک تتلی سے ڈر گئی بستی
ہے اِسی  میں تو گھر ہمارا بھی

چار کاندھوں پہ چار دن کا ہے
زندگی کا کھرا نظارا بھی

تم نے چھو کر لہو نہیں دیکھا
یہ تو  میرا بھی ہے تمھارا بھی

دھڑکنوں سے جو بات کرتا تھا
آج ہم نے اسے پکارا بھی

ہو گیا ہے دراز تم سے مگر
اس میں شامل ہے قد تمھارا بھی

آج تم سے ملا نہیں کوثر ؔ
خیر، آ جائے  گا دوبارا٭ بھی

٭ قافیوں میں الف بطور حرفِ روی کے ساتھ”ہ“ روی کو بھی قافیہ بنایا جاتا ہے۔ مثلاً کنارا، پکارا کے ساتھ ”دو بارہ“۔یہ بہت عام ہے اور بلا شبہ جائز بھی۔ لیکن دیکھا گیا ہے کہ شعراء کرام حتیٰ کے اساتذہ(مثلاً اقبالؔ) کے یہاں بھی اس اختلافِ روی کو چھپانے کے لیے لفظ کا املا بدل دیا جاتا ہے تاکہ عیب نظر نہ آئے۔ مثلاً ”دو بارہ“ کو ”دو بارا“۔ فقیر کے نزدیک یہ بالکل بھی درست نہیں ہے، کہ اس سے روی کا اختلاف تو نظر نہیں آتا لیکن املا غلط ہو جاتا ہے اور مبتدی کے لیے سخت نقصاندہ ہے۔ اور ویسے بھی یہ حقیقتاً چونکہ عیب نہیں ہے، اس لیے  ان قوافی کو اصل تلفظ کے ساتھ ہی لکھنا چاہیے۔ (مدیر)
     

نعت- دیکھوں میں جب بھی خواب میں روضہ رسول کا (احمد علی، اسلام آباد)

احمد علی ﷾ (اسلام آباد، پاکستان)

دیکھوں میں جب بھی خواب میں روضہ رسول کا
لکھتا ہوں اک نیا میں قصیدہ رسول کا

دل چاہتا ہے میرا اجازت اگر ملے 
محشر میں بھی سناؤں ترانہ رسول کا

عاصی ہوں میں بجا مرے اعمال ہیچ ہیں
ہے آسرا فقط مرا کلمہ رسول کا

حجاج آ رہے ہیں تو عشاق جا رہے 
چلتا ہے سال بھر ہی سفینہ رسول کا

ہجرت مرے حبیب کی ، یثرب ترا نصیب
یثرب سے بن گیا تو مدینہ رسول کا

آقائے دو جہاں کی علیؔ شان ہی الگ
ہر ذرہ کائنات کا صدقہ رسول کا

     

بریلوی عقیدہ مختارِ کل

شمشیرِ دیوبند

بریلوی دعوے : 
مولوی احمد رضا خان لکھتے ہیں:
’’حضور ﷺ ہر قسم کی حاجت روائی فرما سکتے ہیں دنیا و آخرت کی سب مرادیں حضور ﷺ کے اختیار میں ہیں۔‘‘      
     (برکات الامداد ص۸)
ایک جگہ لکھتے ہیں؛
’’احکام شریعت حضور سید عالم ﷺ کے سپرد ہیں ۔جو بات چاہیں نا جائز فرما دیں ۔جس چیز یا جس شخص کو جس حکم سے چاہیں مستثنیٰ فرما دیں‘‘
                           (الامن والعلی ص ۱۳۱)
ایک جگہ لکھتے ہیں:
’’رسول کے حکم دینے سے کام فرض ہو جاتا ہے اگرچہ فی نفسہ خدا کا فرض نہ تھا ایک مباح و جائز امر تھا‘‘ 
(الامن والعلی ص ۱۳۰)
مولوی امجد علی لکھتے ہیں؛
’’حضور اقدس اللہ عزوجل کے نائب ہیں تمام جہان حضور کے تحت تصرف کر دیا گیا ہے جو چاہیں کریں جو چاہیں دیں جس سے جو چاہیں واپس لیں۔ تمام جہان میں ان کے حکم کا پھیرنے والا کوئی نہیں۔ تمام زمین انکی ملک ہے تمام جنت انکی جاگیر ہے ملکوت السموٰت و الارض حضور کے زیر فرمان جنت و نار کی کنجیاں دست اقدس میں دے دی گئیں۔ رزق و خیر اور ہر قسم کی عطائیں حضور ہی کے دربار سے تقسیم ہوتی ہیں۔ احکام تشریعہ حضور کے قبضہ میں کر دئیے گئے کہ جس پر جو چاہیں حرام فرما دیں اور جس کے لئے جو چاہیں حلال کر دیں اور جو فرض چاہیں معاف فرما دیں‘‘
( بہار شریعت)
مولوی احمد رضا صاحب لکھتے ہیں:
میں تو مالک ہی کہوں گا کہ ہو مالک کے حبیب
یعنی محبوب و محب میں نہیں میرا تیرا
                 (حدائق بخشش حصہ اول ص ۲)
ایک جگہ لکھتے ہیں:
احد سے احمد اور احمد سے  تجھ کو
کن اور سب کن مکن حاصل ہے یا غوث
                 (حدائق بخشش حصہ ۲ ص ۹)
یہ تو حضرت جیلانیؒ کے اختیار بھی احمد رضا نے واضح کر دئیے۔ 
مفتی احمد یار نعیمی کہتے ہیں:
’’حضور ﷺ کو یہ اختیار دیا گیا ہے کہ جس کے لئے چاہیں اس کی زندگی ہی میں توبہ کا دروازہ بند کر دیں کہ وہ توبہ کرے اور قبول نہ ہو اور جس کے لئے چاہیں بعد موت بھی توبہ کا دروازہ کھول دیں اور اس کو زندہ فرما کر مسلمان کر دیں۔ ‘‘
                       (سلطنت مصطفی ص۴۷)
ایک اور جگہ لکھتے ہیں:
’’اس طرح اپنے مقبول انسانوں کے سپرد بھی عالم کا انتظام کیا اور ان کو اختیارات خصوصی عطا فرمائے‘‘
(جاء الحق ص ۲۰۵)
ایک اور صاحب لکھتے ہیں:
’’رسول اللہ کو پوری خدائی طاقت دی گئی ہے۔  جب ہی تو خد کی طرح مختار کل ہیں اور نائب کل‘‘
                             (شرح استمداد ص ۶)
مفتی احمد یار لکھتے ہیں:
’’خدا جس کو پکڑے چھڑائے محمد،         محمد جس کو پکڑے نہیں چھوٹ سکتا‘‘
                             (رسائل نعیمیہ ص ۱۶۴)
آپ حضرات نے رضا خانیوں کے دعوے تو پڑھ لئے اب اس کے خلاف دعوے بھی دیکھیں۔ 
مفتی احمد یار نعیمی لکھتے ہیں :
’’کلی اختیارات اور مکمل علم غیب پر خدائی دارومدار ہے‘‘
                        (مواعظ نعیمیہ ص ۲۷۳)
لیجئے یہ مفتی صاحب کا فتوی سب مولویوں پر لگ گیا جن کے دعوے آپ پڑھ چکے ہیں۔ اور سب لوگ مختار کل کا عقیدہ رکھ کے مشرک ہوئے۔؏
اس گھر کو آگ لگ گئی گھر کے چراغ سے
خواجہ غلام فرید صاحب جن کو بریلوی اپنا اکابر تسلیم کرتے ہیں ان سے کسی نے بارش کی دعا کے لئے عرض کیا تو فرمایا 
’’میں تو بہت چاہتا ہوں لیکن سب چیز خدا کے اختیارمیں ہے‘‘
                       (مقابیس المجالس ۸۰۸)
اسی طرح پیر مہر علی صاحب فرماتے ہیں؛
’’نہ حصولِ خیر کسی کے ہاتھ میں ہے اور نہ دفعِ ضرر کسی کے اختیار میں جو کچھ بھی ہے خداوند تعالی کے ہاتھ میں‘‘
(مہر منیر )
مفتی اقتدار نعیمی لکھتے ہیں:
’’تقدیر مبرم انبیاء کی دعا خصوصیہ سے بھی نہیں ٹلتی‘‘
                       (تفسیر نعیمی جلد ۱۶ص۲۷۳)
مولوی عبد المالک لکھتے ہیں:
’’اے محمد یہ ضروری نہیں کہ جس کو تم دوست رکھو وہ ہدایت پر آ جائے بلکہ یہ امر خدا کے اختیار میں ہے جسکو چاہتا ہے ہدایت دیتا ہے‘‘
                   (شرح کبیر ص ۱۰۳)
مولوی ابو الحسنات قادری لکھتے ہیں:
’’آدم علیہ السلام نے فرمایا حکم الہی کے خلاف نہ ہو گا۔ مجھے ترمیم کا کوئی اختیار نہیں۔ ‘‘
     (اوراق غم ص۷)
پیر نصیر الدین نصیر صاحب گولڑوی لکھتے ہیں:
’’اللہ کا غیر دینے پر قادر ہے نہ روکنے پر دفع ضرر پر قادر ہے نہ تحصیل نفع پر۔ کیوں کہ وہ خود امنی جانوں کے لئے کسی نفع اور نقصان کے مالک نہیں۔ ‘‘
                (اعانت و استعانت کی شرعی حیثیت ص۹۴)
مولانا کرم الدین دبیر صاحب جن کو بریلوی اپنا اکابر مانتے ہیں وہ لکھتے ہیں:
’’یہ مسلم امر ہے کہ موت و حیات خدا کے اختیار میں ہے کسی انسان کو اس کا اختیار نہیں دیا گیا۔ لیکن یہ شیعہ کا اعتقاد ہے کہ آئمہ اہلبیت کو موت و حیات پر کلی اختیار تھا‘‘
                       (آفتاب ہدایت۱۶۹)
تو آپ نے دیکھا کہ بریلوی حضرات لوگوں کو شیعہ بنانے پر تلے ہیں۔ 
 شیخ جیلانی ؒشیعہ کے فرقہ مفوضہ کا عقیدہ یوں لکھا ہے کہ جو مفوضہ ہیں وہ کہتے ہیں کہ اللہ نے تدبیر خلق کا مسئلہ آئمہ کے سپرد کر دیا ہے       (غنیہ الطالبین جلد۱ ص۱۸۲ قدیم)
مولوی محمد صادق نقشبندی لکھتے ہیں:
’’سیدنا حمزہ رضی اللہ عنہ حضور حضرت رسالت مآب ﷺ میں حاضر ہوئے اور انکی آنکھوں میں آنسو تھے اور یہ کہتے تھے کہ یا رسول اللہ ﷺ آپ نے اپنے چچا کو باہر پھینکا اور چچا کے بیٹے کو اندر بلایا تو آپ نے فرمایا چچا میں مامور ہوں مجھے اس امر کا اختیار نہیں۔“
(تاریخ مدینہ ص۱۱۴)
احمد رضا کے ابا لکھتے ہیں:
’’آپ نے چاہا کہ ابو طالب کی بخشش کے واسطے دعا کریں حکم آیا پیغمبر اور مسلمانوں کو لائق نہیں کہ مشرکوں کے لئے اگرچہ وہ ان کے رشتے دار ہوں دعا کریں استغفار کریں۔ اے عزیز وہ حاکم ہے محکوم نہیں، غالب ہے مغلوب نہیں۔ مالک ہے تابعدار نہیں۔ اگر تیری دعا قبول نہ فرماوے۔ تجھے نا خوشی اور غصے یا شکایت اور شکوے کی مجال کب ہے۔ جب خاصوں کے ساتھ یہ معاملہ ہے کہ جب چاہتے ہیں عطا کرتے ہیں جب چاہتے ہیں منع فرما دیتے ہیں تو تو کس شمار میں ہے کہ اپنی بات کا اصرار کرتا ہے۔ ‘‘
(الکلام الاضح ص۳۰۸)
مفتی احمد یار لکھتے ہیں :
’’آپ علیہ السلام نے فرمایا کہ میں پہاڑ کو سونا بنانے یا خلق اشیاء پر قدرت نہیں رکھتا‘‘
                       (مواعظ نعیمیہ حصہ ۲)
مفتی مظہر اللہ لکھتے ہیں :
’’تم کو عذاب الہی سے ڈرایا جاتا ہے تو ڈھیٹ بن کر اس عذاب کی جلدی کرتے ہو وہ عذاب میرے اختیار میں نہیں وہ اللہ کے اختیار میں ہے‘‘
                    ( تفسیرمظہر القرآن جلد ۱ ص۳۸۵)
 علامہ غلام رسول سعیدی لکھتے ہیں:
’’مجھے اس عذاب کے نازل کرنے یا اس کو مقدم اور مؤخر کرنے پر قدرت نہیں ہے اور اگر بالفرض یہ  معاملہ میرے اختیار میں ہوتا وہ میں تمہارے مطالبہ عذاب کو لا چکا ہوتا‘‘
                      (تبیان القرآن ص ۴۹۵ جلد ۳)
آپ نے دیکھ لیا یہ بریلوی حضرات نبی ﷺ کو تمام اختیار کا مالک نہیں مان رہے ۔ 
علامہ سعیدی لکھتے ہیں:
’’دوسری قسم وہ ہے جو نبی کا فعل نہ ہو۔ لیکن اس کا کسی وجہ سے نبی سے تعلق ہو۔ حضور ﷺ پر کلام الہی کا نزول یا پتھر کا حضرت موسی علیہ السلام کے کپڑے لے بھاگنا یہ معجزے ہیں۔ لیکن ان کے اظہار میں حضور ﷺ یا حضرت موسی علیہ السلام کے اختیارکا کوئی دخل نہ تھا‘‘
                    (مقالات سعیدی)
احمد رضا صاحب لکھتے ہیں:
’’اور اگر تم انکی ہدایت کی حرص کروتو بے شک اللہ ہدایت نہیں دیتا جسے گمراہ کرے‘‘
(کنزالایمان النحل، نمبر ۳۷)
ایک جگہ یوں لکھا:
’’بے شک یہ نہیں کہ تم جسے اپنی طرف سے چاہو ہدایت کر دو۔ ہاں اللہ ہدایت فرماتا ہے‘‘
                          (کنزالایمان القصص، نمبر ۵۶)
جس ترجمہ پر ناز تھا اسی نے مسلک کی نیا ڈبو دی۔ 
بریلوی مفتی ٖفیض احمد اویسی لکھتے ہیں:
’’آپ کی لاعلمی اور عدم اختیار ثابت کرنا جاہلوں یا نبوت کے گستاخوں کا کام ہے۔ ‘‘
                    (لا علمی میں علم ص ۱۵)
 لیجیے ان منکروں پو گستاخ رسول کا فتوی لگ گیا۔ اور جو تمام اختیار مانتے ہیں ان پر مشرک اور شیعہ ہونے کے فتوے ہیں۔ 
مفتی امین صاحب فیصل آبادی لکھتے ہیں:
’’اللہ کے پیارے حبیب ﷺ کی ذات ستودہ صفات میں عیب تلاش کرنا ہو گا کہ نبی کو فلاں چیز کا علم نہیں فلاں چیز کا اختیار نہیں‘‘
                       (دو جہاں کی نعمتیں ص۳۹)
ان کے مطابق جو یہ کہے کہ نبی ﷺ کو فلاں چیز کا اختیار نہیں وہ نبی کو عیب لگاتا ہے اور نبی کو عیب لگانا کفر ہے ۔ تو ان کے فتوے سے وہ سب کافر ہوئے جن کے حوالے پیش ہوئے۔ 
آپ نے دیکھا کہ یہ بدعتی عقیدے جیسے مسئلہ پر متفق نہیں۔ کوئی ایران کی تو کوئی توران کی بات کرتا ہے۔ 

عقیدہ مختار کل پر عقلی دلائل:
۱:اگر نبی ﷺ مختار کل ہیں تو اپنے چچا کو باوجود خواہش کے ہدایت کیوں نہ دے سکے۔ 
۲:توبہ کا دروازہ کھولنا آپ ﷺ کے ہاتھ میں ہے تو کیا آپ نے کیا ابو طالب پر توبہ کا دروازہ بند کیا ہوا تھا جو وہ اسلام نہ لا سکے؟
۳:کیا نبی ﷺ کو تبلیغ رسالت چھوڑنے کا اختیار تھا؟
۴:کیا مختار کل کسی کے آگے جواب دہ ہوتا ہے؟
۵: اگر آپ ﷺ مختار کل ہیں تو مشرکوں کے لئے دعائے بخشش کیوں نہ کر سکے؟
۶:اگر نبی مختار کل تھے تو نبی ﷺ عذاب نازل کیوں نہ کر سکے؟ جب کہ
مفتی مظہر اللہ شاہ لکھتے ہیں :
’’تم کو عذاب الہی سے ڈرایا جاتا ہے تو ڈھیٹ بن کر اس عذاب کی جلدی کرتے ہو وہ عذاب میرے اختیار میں نہیں وہ اللہ کے اختیار میں ہے‘‘
                    ( تفسیر مظہر القرآن جلد ۱ ص۳۸۵)
اگر مختار کل تھے تو عذاب نازل کرنے کا اختیار نہ ہونے کا کیا مطلب؟؟
۷:مختار کل کو بھی کیا مدد اور نصرت کی ضرورت ہوتی ہے؟
۸:کیا حضور ﷺ کو حلال و حرام کرنے کا پورا اختیار حاصل تھا؟؟اگر آپ کہیں ہاں علامہ عینی ؒ صاف فرماتے ہیں 
انالتحلیل و تحریم من عند اللہ لا مدخل لبشرِ فیہ
 کہ تحلیل و تحریم میں کسی بشر کو دخل نہیں۔ 
(عمدۃ القاری جلد ۱۲ ص۷۴۵)
اب یا تو علامہ عینی کافر ہیں یا آپ سچے ہیں۔ 
٭٭٭ 

     

ملفوظاتِ اعلیٰ حضرت کا جائزہ (قسط۔۲)

مولانامفتی نجیب اللہ عمر ﷾(کراچی، پاکستان)

 (۹) لفظ بدلنے اور اضافے کی ایک اور مثال :
احمد رضا ایک سوال کے جواب میں کہتے ہیں:
’’ہم نہ اسکی ذات سے بحث کر سکتے ہیں نہ اسکی کسی صفت سے حدیث میں ارشاد فرمایا:
تفکرو فی اٰلاء اللہ و لا تفکرو فی ذات اللہ فتھلکو
ترجمہ احمد رضا: اﷲ کی نعمتوں میں فکر کرو۔ اور اسکی ذات میں فکر نہ کرو کہ ہلاک ہو جاؤ گے۔‘‘
{ملفوظات اعلٰی حضرت حصہ دوم صفحہ۱۶۳نوری کتب خانہ لاہور}
اصل الفاظِ حدیث :
حالانکہ حدیث کے الفاظ ایسے نہیں جیسے احمد رضا نے نقل کئے ہیں بلکہ اصل الفاظ یوں ہیں:
”تفکروا فی خلق اﷲ ولا تفکروافی اﷲ فتھلکوا‘‘(ابو الشیخ عن ابی ذّر)
{کنز العمال کتاب الاخلاص قسم الاقوال حدیث نمبر۵۷۰۲ ج ۳  ص ۴۷ ادارۃ تالیفات الشرفیہ}
غلطیاں:
(۱) اس روایت میں احمد رضا نے لفظ ’’خلق اﷲ‘‘ کو ’’آلاء اﷲ‘‘ سے بدل دیا ۔
(۲) اور لفظ ’’فی اﷲ‘‘ کو ’’فی ذات اﷲ‘‘ سے تبدیل کر دیا اور حدیث میں اپنی طرف سے لفظ زائد کرنے کے جرم کا ارتکاب کیا۔
(۳) اور اس جگہ احمد رضا نے حدیث کا جو ترجمہ کیا ہے وہ اس بات کی گواہی دے رہا ہے کہ یہ غلطی احمد رضا کی ہے اور انہی کے حافظے کا کمال ہے۔
(۱۰)حذف اور اضافہ کی عادت یہاں بھی پوری کر دی:
ایک جگہ احمد رضا خان لکھتے ہیں:
’’غزوہ بدر شریف میں مسلمانوں نے کفار کی نعشیں جمع کر کے ایک کنویں میں پاٹ دیں۔ حضور ﷺ کی عادت کریمہ تھی جب کسی مقام کو فتح فرماتے تو وہاں تین دن قیام فرماتے تھے ۔یہاں سے تشریف لے جاتے وقت ا س کنویں پر تشریف لے گئے جس میں کافروں کی لاشیں پڑی تھیں اور انھیں نام بنام  آواز دے کر فرمایا :ہم نے تو پا لیا جو ہم سے ہمارے رب نے سچّا وعدہ (یعنی حضرت کا)فرمایا۔ کیوں تم نے بھی پایا جو سچا وعدہ (یعنی ”نار“ کا)تم سے تمہارے رب نے کیا تھا۔ امیر المؤمنین فاروق اعظمؓ  نے عرض کی’’ یا رسول اﷲ اجساد الارواح فیھا ‘‘یا رسول اﷲ کیا حضور بے جان جثوں سے کلام فرماتے ہیں ۔فرمایا: مَااَنْتُمْ باسمع منھم۔ تم کچھ ان سے زیادہ نہیں سنتے مگر انھیں طاقت نہیں کہ لوٹ کر جوا ب دیں تو کافر تک سنتے ہیں‘‘
{ملفوظات اعلیٰ حضرت حصہ دوم صفحہ۱۸۳نوری کتب خانہ لاہور}
اصل الفاظِ حدیث اور اس میں نقل کی غلطیاں :
یہ روایت صحیح البخاری  ۵۶۶  ج ۲  کتاب المغازی  باب قتل ابی جہل میں ہے۔ لیکن احمد رضا نے حضرت عمر ؓ  کا قول صحیح نقل نہیں کیا حضرت عمرؓ  کے قول کے الفاظ یہ ہیں۔
’’یارسول اﷲ ماتکلم من اجسادٍ لا ارواح لھا‘‘
(۱) جبکہ احمد رضا نے ’’ماتکلم‘‘کے جملہ کواور ’’مِنْ‘‘کو غائب کردیا ۔
(۲) اور دوسرے جملہ میں ’’لما اقول‘‘کو حذف کر دیا۔
(۳) اور” مگر انھیں طاقت نہیں“ سے” سنتے ہیں “ تک کا جملہ حدیث کے ترجمہ میں بڑھا دیا۔
(۱۱)لفظ ’’بشئی‘‘کو ’’الشَّیْب‘‘سے بدل دیا :
عرض :حضور ایک کتاب میں میں نے دیکھا کہ حضرت امام حسین ؓ کی شہادت کے وقت ریش مبارک میں خضاب تھا۔۔۔
ارشاد: خضاب سیاہ یا اسکی مثل حرام ہے۔ صحیح مسلم شریف کی حدیث میں ہے ’’ غیِرّوا ھٰذا الشیب ولاتقربوا السواد‘‘
ترجمہ احمد رضا: اس سپیدی کو بدل دو اور سیاہ کے پاس نہ جاؤ ۔
{ملفوظات اعلٰی حضرت حصہ دوم صفحہ۲۰۴نوری کتب خانہ لاہور}
حدیث اصل الفاظ:
احمد رضا نے جن لفظوں کے ساتھ صحیح مسلم شریف سے حدیث نقل کی ہے ان الفاظ کی حدیث مسلم شریف میں بالکل موجود نہیں ہے۔
بلکہ اصل میں حدیث کے الفاظ یوں ہیں۔
’’غیروا ھٰذا بشئٍی واجتنبوا السواد‘‘
ترجمہ: اس کو کسی چیز سے بدل دو اور سیاہی سے بچو۔
(صحیح مسلم ص۱۶۴  ج ۲کتاب الزینۃ ۔باب استحباب الخضاب الشیب بصفرۃ حدیث  ۲۱۰۲مکتبہ دار ابن حزم بیروت)
نقلِ حدیث میں غلطیوں کی نشاندہی:
(۱)اس حدیث میں احمد رضا خان نے ’’بشئی ٍ ‘‘کو ’’الشیب‘‘سے بدل دیا۔
(۲) اور ’’اجتنبوا‘‘کو ’’ولاتقربوا‘‘سے تبدیل کردیا۔
(۳) اور پھر اس حدیث کا ترجمہ بھی کیا ہے جس میں یہ بات واضح طور پر ثابت ہوتی ہے کہ یہ احمد رضا کے سوا کسی اور کی غلطی نہیں ہے ۔
(۱۲)  حدیث میں لفظ ’’ کَانَ‘‘کم کر دیا:
مسجد کے آداب سے متعلق کہتے ہوئے لکھتے ہیں:
مسجد میں چھینک آئے تو کوشش کرو کہ آہستہ آواز نکلے اسی طرح کھانسی
’’کان النبی ﷺ یکرہ العطسۃ الشدیدۃ فی المسجد ‘‘
ترجمہ احمد رضا: نبی ﷺ مسجد میں زور سے چھینک کو ناپسند فرماتے۔
{ملفوظات اعلٰی حضرت حصہ دوم صفحہ۲۱۸نوری کتب خانہ لاہور}
حدیث کے اصل الفاظ:
جبکہ اس حدیث کے الفاظ یوں ہیں:
’’کان النبی ﷺ کان یکرہ العطسۃ الشدیدۃ فی المسجد‘‘
{شعب الایمان للبیھقی ،فصل فی خفض الصوت بالعطاس حدیث نمبر۵۳۰۶  ص۳۲ ج  ۷  دار الکتب العلمیۃ بیروت}
نقل حدیث کی غلطی:
اس حدیث میں احمد رضا خان نے دوسری دفعہ کے لفظ’’کَانَ‘‘کو اڑا دیا۔ جو اصل حدیث میں موجود تھا۔
(۱۳)  تبدیلی اور حذف کرنا  ایک اور غلطی:
چھینک اچھی چیز ہے ۔اسے بد شگون جاننا مشرکین ہند کا ناپاک عقیدہ ہے۔
حدیث میں تو یہ ارشاد فرمایا:
’’العطسۃ عند الحدیث شاھد عدل‘‘
ترجمہ احمد رضا: بات کے وقت چھینک عادل گواہ ہے۔
یعنی جو کچھ بیان کیا جاتا ہو ۔جس کا صدق و کذب معلوم نہیں اور اس وقت کسی کو چھینک آئے تو وہ اس بات کے صدق پر دلیل ہے۔
{ملفوظات اعلٰی حضرت حصہ دوم صفحہ۲۱۹نوری کتب خانہ لاہور}
حدیث کے اصل الفاظ:
حالانکہ حدیث کے جو الفاظ احمد رضا نے نقل کئے ہیں وہ مکمل اسطرح ہیں ۔
’’عن قتاد قال قالٰ عمر بن الخطاب :لعطسۃ واحدۃ عند حدیث اَحبّ الیّ من شاھد عدل ‘‘(الحکیم)
{کنز العمال کتاب الصحبۃ  العطاس والتشمیت،قسم الاقوال  ۱۹  ج  ۹  ص ۲۵۷۷۰  دار الکتب العلمیہ بیروت}
نقلِ حدیث میں غلطیاں:
(۱) اس حدیث میں احمد رضا نے ’’ لعطسۃ‘‘کو ’’ العطسۃ ‘‘سے
(۲) اور’’ عند حدیث‘‘کو ’’عند الحدیث‘‘سے بدل کر
(۳)  لفظ ’’ واحدۃ‘‘ اور
(۴) ’’احب الیّ من‘‘ کو حدیث میں سے اڑا دیا۔
(۵)  اور احمد رضا کی اس غلطی کی نشاندہی اسکا ترجمہ کر رہا ہے۔ جس سے یہ بات واضح ہوتی ہے کہ یہ کاتب یا ناشر کی غلطی نہیں بلکہ احمد رضا کی ہے۔
(۱۴) الفاظ حدیث پورے نقل نہیں کئے:
خود حضور اقدس ﷺ نے ایک دنبہ کی ذبح میں فرمایا:
’’ بسم اﷲ  اﷲاکبر اللَّھُمَّ عن محمدٍ واھل بیتہ‘‘ 
دوسرے کی ذبح میں فرمایا:
’’بسم اﷲ  اﷲ اکبر اللَّھُمَّ عمن لَمْ یضح من اُمَّتی ‘‘
ترجمہ احمد رضا: یہ اس کی طرف سے جس نے میری امت میں قربانی نہیں کی۔
{ملفوظات اعلیٰ حضرت حصہ دوم صفحہ۲۲۰نوری کتب خانہ لاہور}
دوسری حدیث کے اصل الفاظ:
اس عبارت میں احمد رضا خان نے جو دوسری حدیث نقل کی ہے اس کے الفاظ پورے نقل نہیں کئے۔ اور پوری حدیث یوں ہے:
’’بسم اﷲ  اﷲ اکبر اللَّھُمَّ ھذا عنّی وعمن لَمْ یضح من اُمَّتی ‘‘
{ابوداؤ ص ۴۰ جلد دوم حدیث ۲۸۱۰ کتاب الضحایا،باب فی الشاۃ یضحّی بھاعن جماعۃ مکتبہ رحمانیہ لاہور}
نقلِ حدیث میں غلطیاں:
(۱)اس حدیث میں احمد رضا نے لفظ’’ ھذا عنی‘‘ اپنی پرانی عادت کی بنیاد پر بالکل ہی حدیث میں سے غائب کر دیا ۔
(۲) اور ترجمہ بھی اپنے نقل کردہ الفاظ کا کیا ہے۔ جو اس بات کا واضح ثبوت ہے کہ یہ کاتب کی غلطی نہیں ہے ۔
(جاری ہے ...)
٭٭٭

     

یا رسول اللہ ؟؟؟ مخلوق کو غائبانہ ندا - ایک غلط فہمی کا ازالہ

مولانا ساجد خان صاحب نقشبندی﷾(کراچی، پاکستان)

اہل بدعت حضرات سادہ لوح عوام کو مغالطہ دینے کیلئے علماء دیوبند کی چند عبارات پیش کرتے ہیں مثلاً حاجی امداد اللہ مہاجر مکی رحمۃ اللہ علیہ کی عبارت:
”آنحضرت ﷺ کی صورت مثالیہ کا تصور کر کے درود شریف پڑھے اور داہنی طرف یا احمد اور بائیں طرف یا محمد اور یا رسول اللہ ایک ہزار بار پڑھے انشاء اللہ بیداری یا خواب میں زیارت ہوگی ۔“  (کلیات امدایہ ،ص45)
اس کے علاوہ کلیات امدادیہ میں حاجی صاحب ؒ اور نشر الطیب میں مولانا اشرف علی تھانوی ؒ نے ’’یا رسول اللہ ‘‘ کے الفاظ اشعار میں استعمال کئے ہیں۔ اور کہتے ہیں کہ دیکھو جب ہم یا رسول اللہ کہتے ہیں تو شرک کا فتوی لگاتے ہو اور تمہارے اپنے اکابر یہ کہتے ہیں تو کچھ نہیں بولتے۔
جواب: 
سب سے پہلے تو ایک اصول مسئلہ سمجھ لیں کہ شرک و کفر اور ایمان کا دارومدار ’’عقیدہ‘‘ پر ہے ۔یہ ممکن ہے کہ ایک ہی لفظ یا جملہ درست ہوگا لیکن اگر کسی اعتقاد فاسد کی بنیاد پر اسے استعمال کیا جائے تو وہ کفر و شرک ہوگا۔ اس کی بہت ہی عام فہم مثال ہمارے ہاں بلاغت کی کتابوں میں اس طرح ذکر کی گئی ہے کہ دیکھو ’’ انبت الربیع البقلی‘‘اگر اس جملہ کو ایک دہریہ پڑھے گا تو اس کا معنی یہ ہوگا کہ’’ موسم بہار نے فصل اگائی‘‘، لیکن اگر ایک مسلمان اس جملے کو پڑھے تو اس کا مطلب ہوگا کہ نہیں یہ سب کچھ کرنے والی ذات صرف اللہ کی ہے (مختصر المعانی)پہلی صورت میں یہ جملہ کفریہ ہے جبکہ صورت ثانی میں یہ جملہ بالکل درست ہے۔
یہ اصول بریلوی حضرات کو بھی مسلم ہے چنانچہ پیر مہر علی شاہ صاحب کے خلیفہ مجاز جناب مولانا غلام محمد گھوٹوی مرحوم کے حالات زندگی میں لکھا گیا ہے :
’’ایک مرتبہ ایک مولوی صاحب نے حضرت شیخ الجامع علامہ گھوٹوی رحمۃ اللہ علیہ نے ایک فارسی شعر کی بابت استفسار کیا تو حضرت نے فرمایا غلط ہے ان مولوی صاحب نے عرض کیا کہ یہ شعر فلاں شخصیت کا ہے تو حضرت نے فرمایا کہ مووّل ہے یعنی اس کی تاویل لازم ہے ‘‘۔
(شیخ الاسلام محدث گھوٹوی ۔ص:281)
تو معلوم ہوا کہ شاعر کو دیکھ کر فیصلہ کیا جائے گا یعنی اگر شاعر بد عقیدہ ہو جیسا کہ بدعتی حضرات ہیں تو پھر فتاوی جات یونہی سخت ہونے چاہئیں اور اگر حضرت مولانا تھانوی ؒ جیسا متبحر عالم ہو اور حاجی امداد اللہ صاحب جیسا موحد صوفی ہو تو پھر معنی و مطلب حسنِ شعر پر معمول کیا جائے گا اور شعر کی تاویل کی جائے گی۔ ایک اور حوالہ بھی ملاحظہ ہو،  بریلوی شیخ الحدیث مولانا اشرف سیالوی صاحب لکھتے ہیں :
’’علامہ طیبی نے حدیث رسول ﷺ تمسک بسنۃ خیر من احداث بدعۃ یعنی سنت نبوی کا لازم پکڑنا بدعت جاری کرنے سے بہتر ہے کے تحت یوں کہہ دیا سنۃ قذرۃ یعنی گھٹیا سنت۔ علامہ ابن حجر مکی نے اس عبارت پر رد و قدح کرتے ہوئے فرمایا کہ اگر اس شخص کا علم اور صاحب تحقیق ہونا اور نبی اکرم ﷺ سے عقیدت و محبت سے سرشار ہونا ہمیں معلوم نہ ہوتا۔۔۔۔ تو اس کلمہ کی وجہ سے اس پر بہت بڑا سنگین فتوی اور کلمہ شرعی عائد کیا جاتا ‘‘۔
 (مناظرہ جھنگ ۔ص:۲۸۲)
قارئین کرام ! اس سے معلوم ہوا کہ رضا خانی حضرات کا اصول یہ ہے کہ صاحب تحقیق اور صاحب علم اور عشق و محبت سے سر شار آدمی بات کرے تو تاویل کی جائے گی ورنہ فتوی لگایا جائے گا ۔تو پھر ہمیں کہنے دیجئے کہ علماء دیوبند ؒ کا صاحب تحقیق ہونا اور علم سے سرشار و عشق و محبت میں مستغرق ہونا مسلم ہے لہٰذا اگر ایسا شخص کوئی بات کرے تو چونکہ و مشرک نہیں اور شرک کے جراثیم میں ڈوبا ہوا نہیں تو اس کے کلام کی توجیہ اس کے مقام کو دیکھ کر کی جائے گی اور اس سے معلوم ہوا کہ اگر بالفرض کوئی بزرگ اور صاحب تحقیق کوئی غیر شرعی بات کر بھی دے تو حتی الامکان اسے اچھے معنی پر محمول کیا جائے گا۔
ا ب غور فرمائیں اہل السنۃ و الجماعۃ کا عقیدہ ہے کہ کسی مخلوق کو اس عقیدے کے ساتھ غائبانہ طور پر پکارنا کہ وہ اس کی پکار کو عادۃً سنتی ہے اور مافوق الاسباب امور غیر عادیۃ میں اس پکار کو سن کر پکارنے والی کی مشکل کشائی اور حاجت روائی کرتی ہے یا بالفاظ دیگر جس کو پکارا جا رہا ہے وہ عالم الغیب اور ہر جگہ حاضر و ناظر ہے لہذا ہماری پکار سن کر فوراً ہماری مدد کو آ پہنچیں  گے شرک و کفر ہے ۔البتہ اگر کوئی اس نیت سے یا رسول اللہ یا الصلوۃ والسلام علیک یا رسول اللہ پکارتا ہے کہ نہ تو رسول اللہ ﷺ عالم الغیب ہیں نہ حاضر و ناظر نہ ہی مافوق الاسباب میں مشکل کشا حاجت روا بلکہ چونکہ اللہ نے فرشتے مقرر کر رکھے ہیں جو امت کا درود شریف نبی اکرم ﷺ تک پہنچاتے ہیں لہذا اس ضمن میں میرا یہ درود یا یہ الفاظ بھی حضور ﷺ تک پہنچ جائیں گے یعنی ان الفاظ کو بطور اخبار کے پڑھتا ہے یا کوئی محض شوقیہ طور پر عشق و محبت میں یا بطور تو سل ان الفاظ کو پڑھتا ہے تو اس میں کوئی مضائقہ نہیں البتہ جہاں عوام کے غلط فہمی میں پڑنے کا اندیشہ ہو تو وہاں ان الفاظ کا استعمال مناسب نہیں۔ نیز اگر معجزۃ ًیا کرامۃ ً کسی کی ندا اللہ کسی نبی یا ولی کو سنا دے تو ہم اس کے بھی منکر نہیں بشرطیکہ اس پر دلیل شرعی موجود ہو۔
چنانچہ فقیہ العصر مولانا رشید احمد گنگوہی رحمۃاللہ کا ایک فتوی اس ضمن میں ملاحظہ ہو:
سوال: پڑھنا ان اشعار و قصائد کا خواہ عربی میں ہو ں یا غیر عربی میں جن میں مضمون استعانت و استغاثہ بغیر اللہ تعالی ہوں کیسا ہے اور وہ پڑھنا کبھی بطور درود و وظیفہ بنیت انجاح ِ حاجت ہوتا ہے اور کبھی بطور نعت اشعار پڑھے جاتے ہیں ان کے ضمن میں اشعار استمدادیہ و التجائیہ بھی پڑھے جاتے ہیں ۔مثلا یہ شعر،
یارسول اللہ انظر حالنا یا نبی اللہ اسمع قالنا
اننی فی بحر ھم مغرق خذ یدی سھل لنا اشکالنا
یایہ شعر قصیدہ بردہ کا پڑھنا،
یا اکرم الخلق ما لی من الو ذبہ سواک عند حلول الحادث العمم
تو کبھی فقط یہی شعر بطور درود عمل سو دو سو بار پڑھتے ہیں کبھی سارا قصیدہ بطور ورد پڑھتے ہیں اور اس کے ضمن میں وہ اشعار استعانت کے بھی آ جاتے ہیں اور مداومت ورد و ادائے زکوٰۃ ان اشعار و قصائد کی کرتے ہیں اور اسی قسم کے اشعار نعتیہ و استمدادیہ منسوب بہ مولانا جامی و دیگر علماء ہیں اور شاید اشعار مولانا شاہ ولی اللہ محدث دہلوی و مولانا محمد قاسم نانوتوی رحمۃ اللہ علیہما کے بھی بطور قصیدہ نعتیہ متضمن اشعار استمدایہ ہیں۔ پس یہ اشعار استعانت و استغاثہ بغیر اللہ تعالی خواہ ضمن نعت میں تبعا خواہ تنہا مستقلا بطور ورد و وظیفہ بمداومت یا گاہے گاہے خواہ بطور محبت و ذوق و شوق یا کسی اور نیت سے جائز ہیں یا مستحب ہیں یا ممنوع اور شرک ہیں اور اگر ناجائز ہیں اور شرک ہیں تو ان کے مصنفوں کے حق میں کیا کہا جاوے کہ وہ اکابر دین تھے اور پیشوائے اہل یقین۔ امید ہے کہ جواب مسئلہ ہذا بہ تفصیل و تحقیق تمام بطور کلیات و تفصیل جزئیات تحریر فرمائیں  گے کہ دوبارہ سوال کرنے کی ضرورت نہ رہے اور ان اشعار کا پڑھنا اس ملک میں بہت رائج ہے اور ان مسائل کو نہ کوئی دریافت کرتا ہے نہ کوئی عالم بخوف ملامت و طعن خلق صاف صاف بتاتا ہے الا شاذ و نادر ان مسائل کے سائل کو یا بحث کرنے والے کو منکر حضرت ﷺ بتاتے ہیں اور مساجد اور خانقاہوں میں روبرو علماء و مشائخ کے یہ اشعار پڑھے جاتے ہیں اور کوئی عالم یا شیخ کہ بعض حضرات ان میں خوش عقیدہ اور دیندار بھی ہوتے ہیں کچھ تعرض نہیں کرتا اور تقریبات شادی میں بھی اور مجالس اعراس اور میلاد میں بھی اس کا رواج ہے اور پڑھنے والے از خود بدوں طلب کے پڑھنا شروع کر دیتے ہیں اور ہم لوگ جو بعض تقریبات شادی وغیرہ میں شریک محفل بضرورت ہوتے ہیں جو کچھ وہ پڑھنے والا جاہل پڑھتا ہے اگر چہ صاف کلمات شرکیہ و کفریہ سے پڑھے مجبوری سے سننا پڑتا ہے کیونکہ کوئی عالم و رئیس محلہ وغیرہ جو حاضر محفل ہوتے ہیں اس بارہ میں کچھ نہیں کہہ سکتا پھر اور لوگ کیا کہہ سکتے ہیں۔
جواب: 
یہ خود آپ کو معلوم ہے کہ ندا غیر اللہ تعالی کو کرنا دور سے شرک حقیقی جب ہوتا ہے کہ ان کو عالم سامع مستقل عقیدہ کرے ورنہ شرک نہیں ۔مثلاً یہ جانے کہ حق تعالی ان کو مطلع فرمائے گا یا باذنہٖ تعالی انکشاف ان کو ہوجائے گا یا باذنہ ٖ تعالی ملائکہ پہنچا دیں گے جیسا درود کی نسبت وارد ہے یا محض شوقیہ کہتا ہے محبت میں یا عرض حال تحسر و حرمان میں کہ ایسے مواقع میں اگرچہ کلمات خطابیہ بولتے ہیں لیکن ہر گز نہ مقصود اسماع ہوتا ہے نہ عقیدہ ۔پس ان ہی اقسام سے کلمات مناجات و اشعار بزرگان کے ہوتے ہیں کہ فی حد ذاتہٖ نہ شرک نہ معصیت مگر ہاں بوجہ موہم ہونے کے ان کلمات کو مجامع میں کہنا مکروہ ہے کہ عوام کو ضرر ہے اور فی حد ذاتہٖ ایہام بھی ہے لہذا ایسے اشعار کا پڑھنا منع ہے اور نہ اس کے مولف پر طعن ہو سکتا ہے اور کراہت موہوم ہونے کی وجہ غلبہ حجت کے منجر ہو جاتی ہے ۔مگر ایسی طرح پڑھنا اور پڑھانا کہ اندیشہ عوام کے ضرر ہو بندہ پسند نہیں کرتا گو اس کو معصیت بھی نہیں کہہ سکتے مگر خلاف مصلحت وقت کے جانتا ہے مگر ہاں جس کلام میں صاف کلمات کفر ہوں اس کو نہ سننا حلال ہے اور نہ سکوت روا ہے اگر قادر نہ ہو تو الگ ہو جاوے اور جو عالم باوجود قدرت کے اس کو رد نہ کرے یہ مداہنت ہووے گی ۔
(تالیفات رشیدیہ ،ص54,55)
ایک جگہ لکھتے ہیں:
سوال:یا رسول اللہ دور سے یا نزدیک قبر شریف سے پکارنا جائز ہے یا نہیں ؟
جواب: 
جب انبیاء علیہم السلام کو علم غیب نہیں تو یا رسول اللہ کہنا بھی ناجائز ہوگا اگر یہ عقیدہ کر کے کہے کہ وہ دور سے سنتے ہیں بسبب علم ِغیب کے تو خود کفر ہے اور جو یہ عقیدہ نہیں تو کفر نہیں مگر کلمہ مشابہ کفر ہے البتہ اگر اس کلمہ کو درود شریف کے ضمن میں کہے اور یہ عقیدہ کرے کہ ملائکہ اس درود شریف کو آپ کے پیش عرض کرتے ہیں تو درست ہے کیونکہ حدیث شریف میں ہے کہ ملائکہ درود بندہ مومن کا آپ کی خدمت میں عرض کرتے ہیں اور ایک صنف ملائکہ اسی خدمت پر ہیں۔
( تالیفات رشیدیہ ،ص72)
ایک اور مقام پر فرماتے ہیں:
سوال:  ؎
یا رسول کبریا فریاد ہے
یا محمد مصطفی فریاد ہے
مدد کر بہرِ خدا حضرت محمد مصطفی
میری تم سے ہر گھڑی فریاد ہے٭
اشعار اس مضمون کے پڑھنے  کیسے ہیں؟
جواب(مولانا رشید احمد گنگو ہیؒ):
ایسے الفاظ پڑھنے محبت میں اور خلوت میں بایں خیال کہ حق تعالی آپ کی ذات کو مطلع فرما دے یا محض محبت سے بلا کسی خیال کے جائز ہیں اور بعقیدہ عالم الغیب اور فریاد رس ہونے کے شرک ہیں اور مجامع میں منع ہیں کہ عوام کے عقیدہ کو فاسد کرتے ہیں لہذا مکروہ ہوویں گے ۔(تالیفات رشیدیہ ،ص104)
حکیم الامت مولانا اشرف علی تھانوی ؒ لکھتے ہیں:
سوال : کتاب نشر الطیب و رسالہ حفظ الایمان کے دیکھنے سے دو شبہ پیدا ہوئے جن کا استفسار ہے جناب کے نزدیک یا رسول اللہ جائز نہیں جیسا کہ اسی کتاب کی فصل 38بیان توسل سے ظاہر ہے فصل 21شیم الحبیب مصنفہ مفتی الٰہی بخش صاحب کے آخر میں جو قصیدہ نقل کیا گیا ہے اس میں چند جگہ الفاظ یا موجود ہے ، اور جناب نے ہر طریقہ سے منع فرمایا ہے واقعی عوام میں غلو ہے اور علماء کو ان کی حفاظت کے واسطے منع فرمایا یہ بھی درست ہے ،پھر اس قسم کی نظمیں اس کتاب میں لکھ دی گئیں اس کو عوام پڑھیں گے اور علماء بیان کریں گے ،گویا منع و جواز ایک کتاب میں جمع ہو گئے ۔
الجواب :
باِرادہ استعانت و استغاثہ یا باعتقاد حاضر و ناظر ہونے کے منہی عنہ ہے (یعنی منع ہے )اور بدون اس اعتقاد کے محض شوقا ً و استلذاذاً ، ماذون فیہ ہے۔  ( اجازت ہے )چونکہ اشعار پڑھنے کی غرض محض اظہار شوق و استلذاذ ہوتا ہے اس لئے نقل میں توسع کیا گیا ہے لیکن اگر کسی جگہ اس کے خلاف دیکھا جائے گا منع کر دیا جائے گا ۔
(امداد الفتاوی ،ج5،ص390)
مفتی فرید صاحب ؒ آف اکوڑہ خٹک لکھتے ہیں:
سوال : یا مصطفی مشکل کشا کہنا شرک ہے یا نہیں ؟بینوا و توجرو!
الجواب:
ایں الفاظ باعتقاد حاضر و ناظر عالم الغیب گفتن شرک جلی است و بطور عشق و محبت گفتن جائز است و پیغمبر ﷺ را مشکل کشا گفتن بایں معنی کہ از جانب خدا برائے حل مشکلات مقرر ست کذب و کفر است و بایں معنی کہ توسل و دعا او مشکلات حل مے شوند صدق و جائز است۔
 (فتاوی فریدیہ ،ج1،ص72)
فقیہ الہند مفتی محمود الحسن گنگوہی رحمۃ اللہ علیہ لکھتے ہیں:
یا رسول اللہ اس عقیدے  سے کہنا کہ ہر جگہ سے حضور ﷺ اس آواز کو خود سنتے ہیں ناجائز ہے اور اس عقیدہ سے کہنا کہ ملائکہ آپ کو اس کی اطلاع کرتے ہیں درست ہے۔
 (فتاوی محمودیہ ،ج1،ص347)
اہل بدعت حضرات عوام کو مغالطہ دینے کیلئے علماء دیوبند کی وہ عبارات جو انہوں نے شوق محبت یا درود شریف کے ضمن میں پڑھیں جس میں یا رسول اللہ کے الفاظ ہیں وہ پیش کرتے ہیں کہ دیکھو تم تو اسے شرک کہتے ہو مگر تمہارے یہ اکابر بھی یہ نعرہ لگاتے ہیں ۔حالانکہ ہم اوپر اس بات کی وضاحت کر چکے ہیں کہ ہمارے اور ہمارے اکابر کے نزدیک علی الاطلاق ’’یا رسول اللہ ‘‘ کہنا شرک نہیں بلکہ اگر اس نیت سے یہ نعرہ لگایا جائے کہ :
(۱) رسول اللہ ﷺ عادۃً اس پکار کو سنتے ہیں
(۲) نبی اکرم ﷺ عالم الغیب و حاضر و ناظر ہیں ہر وقت ہماری پکار کی ان کو خبر ہے
(۳) پکار سن کر ہمیں جواب دیتے ہیں اور مافوق الاسباب میں ہماری مشکل کشائی کیلئے بھی پہنچ جاتے ہیں
اس نظریہ سے کہنا بلاشبہ شرک ہے ۔اور ہمارے اکابر اس شرکیہ عقیدہ سے قطعاً بیزار ہیں ۔ ہم ببانگ دہل چیلنج کرتے ہیں کہ اکابر دیوبند تو کیا چودہ سو سال میں کسی ایک صحابی ،تابعی ،محدث ،فقیہ ،مفسر ،ولی کا کوئی قول مستند سند کے ساتھ پیش کر دو جس نے نبی کریم ﷺ کو اس نظریہ سے پکارا ہو۔ چنانچہ کلیات امدادیہ کی پہلی عبارت میں صاف تصریح ہے کہ: ’’آنحضرت ﷺ کی صورت مثالیہ کا تصور کرے اور درود شریف پڑھے ‘‘ اگر حاجی صاحب نبی اکرم ﷺ کو حاضر و ناظر سمجھتے یا غائبانہ ندا عادۃً سننے کا عقیدہ رکھتے تو مثالی صورت کے تصور کا کیوں کہتے ۔اور ساتھ ہی درود شریف کے ضمن میں اس کو پڑھنے کا کہا کیونکہ حدیث پاک میں ہے کہ اللہ کے مخصوص فرشتے زمین میں پھرتے رہتے ہیں جو میری امت کا صلوۃ و سلام مجھ تک پہنچاتے ہیں۔ 
ان للہ عز و جل ملائکۃ سیاحین فی الارض یبلغونی عن امتی السلام
(المعجم الکبیر ،ج10،ص271،رقم الحدیث10529)
لہذا کوئی اگر اس ضمن میں الصلوۃ والسلام علیک یا رسول اللہ پڑھتا ہے کہ فرشتے آپ ﷺ تک اس کو پہنچا دیں گے تو ہمارے نزدیک یہ جائز ہے ۔ہمارے بزرگوں نے روضہ رسول ﷺ کی زیارت کے وقت اس درود کو پڑھنے کی تلقین بھی کی ہے ۔امام اہلسنت مولانا سرفراز خان صفدر صاحب ؒ فرماتے ہیں :
’’ہم اور ہمارے تمام اکابر الصلوۃ والسلام علیک یا رسول اللہ کو بطور درود شریف پڑھنے کے جواز کے قائل ہیں کیونکہ یہ بھی فی الجملہ اور مختصر طریقہ سے درود شریف کے الفاظ ہیں ،ہاں البتہ حرف خطاب اور حرف یا سے حاضر و ناظر مراد لینا کفر ہے چنانچہ مولانا محمد قاسم نانوتوی ؒ نے تصریح کی ہے کہ الصلوۃ والسلام علیک یا رسول اللہ پڑھا جاسکتا ہے مگر آپ کو حاضرو ناظر نہ سمجھو ورنہ اسلام کیا کفر ہوگا “،اصل الفاظ یوں ہیں :
’’اور الصلوۃ والسلام علیک یا رسول اللہ بہت مختصر ہے مگر رسول اللہ کو حاضر و ناظر نہ سمجھنا چاہئے ورنہ اسلام کیا ہوگا کفر ہوگا بلکہ یوں سمجھئے کہ یہ پیغام فرشتے پہنچاتے ہیں ‘‘ 
بلفظہٖ (فیوض قاسمیہ ،ص48)(درود شریف پڑھنے کا شرعی طریقہ ،ص75،76)
اگر اب بھی کسی کی تسلی نہیں ہوئی تو ہم حاجی امداد اللہ مہاجر مکی رحمۃ اللہ علیہ کی ان اشعار کی وضاحت خود بریلوی اکابر میں سے مولانا عبد السمیع رامپور ی سے پیش کر دیتے ہیں یاد رہے کہ اس کتا ب پر مولانا احمد رضا خان صاحب بریلوی کی تقریظ بھی ہے ،مولانا لکھتے ہیں:
”اس کا اصل مطلب یہ ہے کہ میری جان حضرت پر قربان ہے مراد اس سے جملہ خبریہ ہے گو اس نے لفظ ندائیہ بولا ہے کیا ضرور کہ یوں کہو یہ شخص تو خدا کی طرح حاضر ناظر جان کر پکارتا ہے ہاں البتہ تم خود معنی شرک اور کفر کے لوگوں کے ذہن میں جماتے ہو ۔“
(انوار ساطعہ ،ص458)
”یا رسول اللہ“ اس کے معنی قاعدہ عربی سے یہ ہوئے کہ پکارتا ہوں رسول اللہ کو یعنی ان کو یاد کرتا ہوں ان کا نام لیتا ہوں۔ 
(انوار ساطعہ ،ص460)
مولانا نے خود اکابر علماء دیوبند کے ان اشعار کا مطلب واضح کر دیا کہ وہ ہر گز ان اشعار کے پڑھتے وقت نبی ﷺ کو حاضر ناظر نہیں سمجھتے بلکہ ان کا مقصود محض خبر دینا ہے کہ فرشتے حضورﷺ تک اس خواہش کو پہنچا دیں اور آگے کی عبارت میں تو کمال کر دیا کہ یا رسول اللہ کا معنی حاضر ناظر مشکل کشا سمجھ کر نہیں بلکہ اس کے معنی تو صرف حضور ﷺ کو یاد کرنے کے ہیں۔٭
اس موقع پر اہل بدعت کا ایک شبہ یہ بھی ہے کہ حضرت عبد اللہ بن عمرؓ کا پاؤں سُن ہو گیا تھا تو ان کو کسی نے کہا کہ ایسے شخص کو یاد کیجئے جو آپ کو سب سے زیادہ محبوب ہو تو اس نے پکارا یا محمد ﷺ اور ان کی تکلیف دور ہو گئی۔  (الادب المفرد)روایت کی سند سے قطع نظر بحث محض پکارنے میں نہیں بحث تو اس میں ہے کہ کسی کو اس نظریہ سے پکارا جائے کہ وہ عادۃً سنتی ہے اور اس کی مشکل کشائی اور حاجت روائی کرتی ہے جبکہ مذکورہ واقعہ میں جسمانی بیماری کا ایک نفسیاتی علاج بتایا گیا ہے کہ جب پیر سُن ہو گیا تو سب سے زیادہ محبوب شخصیت کو یاد کیجئے کیونکہ محبوب کے ذکر سے انسان کے دل میں حرارت اور نشاط کی کیفیت پیدا ہو جاتی ہے جس سے منجمد خون رواں ہو جاتا ہے اور رگوں میں دوڑنا شروع کر دیتا ہے اور یوں سُن والی کیفیت دور ہو جاتی ہے ۔

بریلوی مفتی اعظم کا فتوی

آخری اتمام حجت کیلئے ہم یہاں اہل بدعت کے مفتی اعظم مفتی شاہ مسعود جو بریلوی مسعود ملت پروفیسر مسعود کے والد ہیں لکھتے ہیں:
’’واضح ہو کہ یا رسول اللہ کہنا سونے اور نشست اور ہر کار وغیرہ کے وقت ممنوع ہے اور بنیت  ِحاضر و ناظر کہنا موجب شرک ہے۔
(فتاوی مسعودی ،ص529، مطبوعہ سر ہند پبلی کیشنز کراچی ،طبع اول)

قاضی ثناء اللہ پانی پتی حنفی رحمۃ اللہ علیہ کا فتوی اور سیفیوں کی بد ترین تحریف کا انکشاف

قاضی صاحب رحمۃ اللہ علیہ لکھتے ہیں:
آنچہ جہا ل می گویند یا شیخ عبد القادر جیلانی شیاء للہ یا خواجہ شمس الدین پانی پتی شیاء للہ جائز نیست شرک و کفر است۔
(ارشاد الطالبین فارسی ،ص29)
یہ جو جاہل کہتے ہیں کہ یا شیخ عبد القادر جیلانی شیاء للہ یا یا خواجہ شمس الدین پانی پتی شیاء للہ ( یا یا رسول اللہ وغیرہ کلمات شرکیہ)جائز نہیں ہے بلکہ شرک و کفر ہے۔
ارشاد الطالبین کا یہ نسخہ حکیم عبد المجید احمد سیفی نے لاہور سے شائع کیا ہے ۔مگر موجودہ سیفیوں کی دیانت و امانت کا حال ملاحظہ ہو کہ سیفی استاذ العلماء پیر عابد حسین سیفی نے جب اس کا ترجمہ بمع فارسی متن شائع کیا جس پر کئی سیفی بزرگوں کی تقریظات ہیں ارشاد الطالبین کی اس عبارت سمیت پورے دو (۲) صفحات جس پر شرکیہ عقائد کا زبردست رد تھا غائب کر دئے نہ اصل متن دیا نہ اس کا ترجمہ ۔
شرم ،شرم ،شرم !کیا اسی دھوکا بازی ،دجل و تلبیس ،بددیانتی و تحریف کا نام تصوف ہے ؟
خود بدلتے نہیں قرآن کو بدلتے ہیں
ہوئے کس درجہ فقیہانِ سیفیہ بے توفیق٭
٭٭٭

٭ علامہ اقبالؔ کا مذکورہ شعر کچھ یوں ہے(بحوالہ کلیاتِ اقبال ص ۵۳۴)
خود بدلتے نہیں قرآں کو بدل دیتے ہیں
ہوئے کس درجہ فقیہانِ حرم بے توفیق
محبی و مشفقی حضرت مولانا ساجد خان صاحب نقشبندی  نے مصرع ثانی میں  ”حرم“ کو ”سیفیہ“ سے بدل کر یقیناً مضمون سے مطابقت پیدا کرنی چاہی تھی لیکن اس رد و بدل میں مصرعِ مذکورہ بحر سے خارج ہو گیا ہے۔ اس طرح کی تبدیلیاں کرتے وقت یہ غلطی  بہت عام ہے اور کثرت سے نظر سے گزرتی ہے، چنانچہ  اس کا سد باب بھی اتنا ہی ضروری ہے۔ 
(مدیر)