گریۂ خوں

عارف باللہ حضرت شاہ حکیم محمداختر صاحب رحمہ اللہ

جب کبھی دل سے آہ کرتا ہوں

منزلیں پیشِ راہ کرتا ہوں

عشق کی نامراد وادی میں

اپنے غم سے نباہ کرتا ہوں

ساری خلقت سے دور ہو کے کبھی

دشت کو خواب گاہ کرتا ہوں

صبر کو شکوہ و گلہ کیوں ہے

ضبطِ غم بے پناہ کرتا ہوں

گریۂ اشک عشق میں کیا ہے

گریۂ خوں بھی گاہ کرتا ہوں

دردِ دل جب شدید ہوتا ہے

یاد میں اُن کی آہ کرتا ہوں

لذتِ ذکر کیا کہوں اخترؔ

جھوم کر واہ واہ کرتا ہوں